toqutsineq
Tasiilami toqutsisutut unnerluutigineqartoq sianissutsimigut misissorneqassaaq
Angut 72-inik ukiulik januaarimi arnamik 29-nik ukiulimmik toqutsisutut nassuerutiginnittoq maanna sianissutsimigut misissorneqassaaq
Januaarip 13-ianni arnaq 29-nik ukiulik Tasiilami aallaaneqarluni toqunneqarpoq.
Angut 72-inik ukiulik tamatuma kinguninngua tigusarineqarpoq, arnamillu toqutsinini nassuerutigaa.
Atuaruk: 72-inik ukiullip Tasiilami toqutsinini nassuerutigaa
Angut eqqartuussaannginnerani sianissutsimigut misissorneqaqqaarnissaa aalajangiunneqarpoq. Politeeq Mathæus Larsen Sermitsiaq.AG-mut ilisimatitsivoq.
- Tarnikkut misissuineq qaqugu pisinnaassanersoq psykiatriimit maanna nalunaarfigineqarnissarput utaqqivarput, Mathæus Larsen.
Sianissutsimik misissuineq Nuummi Danmarkimiluunniit pisinnaavoq. 72-inik ukiulik Tasiilami suli tigummigallarneqarluni paarnaarussaaqqavoq.
Toqutsineq unnerluunneqartup angerlarsimaffiani pivoq. Taanna arnarlu toqunneqartoq imminnut ilisarisimapput, imminnullu takusarlutik.
Atuaruk: Kommunimi upalungaarsimasuutitat Tasiilamukartut
Tasiilami arnat inuusuttut marluk sapaatip-akunnerani imminut toqoreersut alianartumik toqutsisoqarneranik naggaserneqarpoq.
Kommuneqarfik Sermersuup illoqarfimmut eqqugaasunut oqaloqatiginnittussanik aallartitsineranik tamanna kinguneqarpoq.