aalisakkerivik
Tasiilami suliffissaaleqisut Avannaani suliffittaartut
Kommuneqarfik Sermersuup aamma Royal Greenlandip akornanni suleqatigiinnikkut kangiani illoqarfimmi suliffissaaleqisut 15-t sulilersinneqarput
Tasiilami suliffissanik amigaateqarnerup nassataanik illoqarfimmi suliffissaaleqisorpassuit najukkaminni suliffissarsisinnaanngillat.
Kommuneqarfik Sermersooq taamaattumik innuttaasut suliffeqanngitsut sulilersinniarlugit allatut iliuuseqarpoq.
Royal Greenlandilu isumaqatiissuteqartut
Kommuneqarfik Sermersooq Royal Greenlandimut attaveqarsimavoq, suliffeqarfissuaq Nunatta avannaani sumiiffinni arlalinni sulisussanik amigaateqarmat.
Kommunilu isumaqatigiissummik angusaqarpoq, taamaalilluni Tasiilami suliffissaaleqisut 15-it utaqqiisaasumik Avannaani Royal Greenlandimut suliartorallarsinnaanngorput.
Allatut aaqqiissut
Kommuneqarfik Sermersuup Tasiilami immikkoortortaani suliffeqarnermut siunnersortit pisortaat, Kurt Pedersen, Kalaallit Nunaata suliffeqarfiini annersaannik isumaqatigiissuteqarneq qiimmatsaatigaa.
- Nuannaajallannaqaaq inuit suliffissarsinissaannut nutaanik aaqqiissutissanik isumatuunillu ikiorsinnaagutsigit. Nunatta sinnerani akuttunngitsumik piffissami aalajangersimasumi sulisussanik amigaateqartoqartillugu pisariaqanngilaq Tasiilami suliffissaaleqisut ikiorneqarsinnaanngippata, taanna tusagassiuutinut nalunaarummi oqarpoq.
Sulilertut amerlanerusut
Piffissami matumani Tasiilami suliffissaaleqisut qulit aallakaasut, kommuni ilisimatitsivoq.
Namminersorlutik Oqartussat ataanniittoq Nuttarsinnaanermut aningaasaateqarfik ikiortigalugu suliffissaaleqisut allat tallimat Uummannap eqqaanut tunisassiornermik suliaqariartorlutik aallassapput.
Nuttarsinnaanermut aningaasaateqarfik ikiortigalugu Kommuneqarfik Sermersuumit ingerlaavartumik alapernaanneqassaaq kommunimi innuttaasut amerlanerit najukkatik qimallugit sulilersinneqarsinnaanerat.
Atuaruk: Suliffissarsiortut suli ikiliartorput