nakkutilliineq
Tasiilami suli sumiginnaasoqartoq
Tasiilami nunaqarfinnilu meeqqat 1.000-ngajaat suli Kommuneqarfik Sermersuumit sumiginnarneqarput, tassami pisariaqartinneqartumik taamaallaat aaqqiigallartoqattarmat. Kingullermik nakkutilliiartortoqarneranut sanilliullugit pissutsit pitsaanerulersimasut kommunimit oqaatigineqarpoq.
Ilaqutareeqarnermut, Naligiissitaanermut Isumaginninnermullu Naalakkersuisoqarfimmit nakkutilliiartornermit nalunaarusiaq naapertorlugu Tasiilami nunaqarfiinilu meeqqanut suliassaqarfimmi suli ilungersunartorsiortoqarpoq. Nakkutilliiartortut ukioq´manna februaarip naanerani marsillu aallartinnerani nalunaaqqaarlutik nakkutilliiartorput.
AG taama allappoq.
Tassani nakkutilliiartortitat siornaammat nalunaarusiamik assuarnartumik malinnaatitsissapput, tassanilu sullissisut pingasut suliassanik meeqqanut tunngasunik 520-nik suliassaqarpallaarujussuartut aamma suliassanik suliarinnittarnerit Naalagaaffinni Peqatigiinni Meeqqat pillugit isumaqatigiissutinik naammaasinninngilluinnartut inerniliunneqarput.
Siullermik nakkutilliiartortoqarneranit pitsaanngortoqarsimasoq, ilaatigut kommunimi angalasartut ikiortigalugit, suli iluarsiisoqarnissaanut amilaarnartumik aqqutissaqarallartoq nakkutilliiartortunit nalunaarusiami nutaami inerniliunneqarpoq.
- Nakkutilliiartortulli naak tamakkuninnga suliniuteqartoqaraluartoq aamma illoqarfimmi ingerlatsivimmi assorujussuaq suliniuteqartoqaraluartoq maannakkut aqutsinermi inatsisit malillugit suliassatik suliarisinnaanngilluinnarpaat. Maannakkut ikiuuttut angalasartoqatigiit maannakkutut itsillugit naammanngillat, nakkutilliiartortitat allapput.
Kommuneqarfik Sermersuumi ajornartorsiutip annertussusia nassuerutigineqarpoq aamma tamanna ilungersunartuusorigitsik erseqqissaatigaat. Taamaattumik ilaatigut sualissaqarfimmi aaqqissuusseqqittoqarsimallunilu suliassaqarfimmik nukittorsaasoqarsimavoq kiisalu Namminersorlutik Oqartussani Isumaginninnermut aqutsisoqarfimmiut suleqatigineqalersimapput.
Tamanna pillugu AG-mi paasisaqarnerusinnaavutit: