atukkat pitsaanerusut
Tasiilami sanaluttarfik nutaaq
Tunumi illoqarfik siornatigut ajorluinnartunik sanaluttarfeqarsimasoq, ininut nutaanut nuuppoq
Tasiilami sanaluttartunut nutaarsiassatsialaqarpoq.
Tassami sanaluttarfik 'Stunken', mikivallaarlunilu ullutsinnut naleqqutinngitsoq, ininut nutaanut nuuppoq.
Sanaluttarfik ullumikkut Eqqartuussivittut atorneqartummut nuussaaq. Eqqartuussivik illoqarfiup kommunip allaffiata inaanut nuussamaarpoq.
Kommuneqarfik Sermersooq taama nalunaaruteqarpoq.
2 millionit koruunit
Kommunimi kommunalbestyrelsi aappaagumut missingersuutitigut 2 millionit koruuninik immikkoortitsivoq, aningaasallu iluarsartuussinermut aamma sanaluttarfimmut atortussanik nutaanik pisinermut atorneqassapput.
- Tasiilami sanaluttartut aallartitaat oqaloqatigaakka, taakkulu Stunkenimi sanaluttarnermi atortorissaarutitigut atugaqartitaanertik naammagittaalliuutigaat. Tunumi sanaluttarnikkut eqqumiitsuliat qangaaniilli ileqqorineqartoq naapertorlugu suliarineqartartut eriaginissaat inerisarnissaallu pingaaruteqarpoq, borgmesteri Asii Chemnitz Narup (IA) taama oqarpoq.
Iluarsartuunneqassasut
Eqqartuussivik iluarsartuunneqassasoq, iluarsartuunneqareerpallu aatsaat sanaluttartut nutsersinnaasut, sanaluttarfissarlu peqatigiiffittut qaammatikkaartumik akiliuteqarfiusussatut ingerlanneqassasoq, Sermersooq ilisimatitsivoq.
- Taamaattumik una sanaluttarfimmi atuisunut nutaarsiassaavoq nuannersoq, aammalumi illoqarfimmut takornariaqartartunut. Init ullutsinnut naleqquttut atorlugit sulinermi atugassaqartitaalernerat sanaluttartut nuannaaqatigaakka, borgmesteri oqarpoq.