forårskoncert
Tasiilami nipilersornermi unammisut
Tasiilami Alivarpi upernaajunerani tusarnaartitsisoqarnerani nipilersornermik unammisitsivoq
Tasiilami Alivarpimmi atuartut nalunaaquttap akunneranik ataatsimik tallimanngornermi sininnerupput iluatsilluartumik upernaajunerani tusarnaartitsineq sisamanngornermi unnukkut naammassineqareersoq. Tusarnaartitsineq iluatsillugu nipilersornermik unammisitsisoqarpoq.
- Atuartut ukioqqortussutsini tamani tunniusimalluarlutik isumassarsiullaqillutillu peqataapput, Tasiilami Alivarpimmiit Jørn Holbech Sermitsiaq.AG-mut oqarpoq.
Nerilluarput
Atuartut ukioqqortussutsinut pingasunut agguarneqarput. Mikinerni ajugaasut tassaapput specialklasset aappaat, akullerni ajugaasut 7 y-upput. Angajullerni ajugaasut tassaapput 10x-it. Ajugaasut pingasut pizzatornissartik qilanaarisinnaavaat illoqarfiup pizzaarniarfiani nerinissaq pinnattaarigamikku.
Upernaajunerani tusarnaartitsineq nuannisarfiulluarpoq.
- Atuartorpassuit pissangarpasipput assuarlutillu takkullutik. Unnuk aallarnerlugu nereqatigiittoqarpoq nerineqartullu tassapput pasta neqilimmik miseqqerlugu saftimillu iggiserlugu. Nerisassat nungullugit nerisoqarpoq, Jørn Holbech oqarpoq.
Unnuk nuannersoq naggaserlugu 10x-it ajugaassutigisartik atoqqippaat.