tuarnaartitsineq
Tasiilami juullerpalaarlutillu nipilersussapput
Juaaka Lyberth aamma Leif Immanuelsen Tasiilami juullerpalaarnermut atatillugu nipilersussapput
Tasiilami arfininngornermi juullerpalaartoqartussanngorpoq tassungalu atatillugu niuffannerup kingorna tusarnaartitsisoqassaaq. Oqaluffimmi tusarnaartitsineq adventip sapaataasa aappaanni pissaaq kiisalu ataasinngornermi meeqqanut utoqqarnullu tusarnaartitsisoqassalluni.
Juaaka Lyberth aamma nutsugiartartoq Leif Immanuelsen arlaleriarlutik Tasiilami ulluni tullerni tusarnaartitsissapput. Arfininngornermi unnukkut nipilersortartut taakku ilisimaneqarluartut timersortarfimmi tusarnaartitsissapput juullimmut niuffattoqareerpat, sunngiffimmi sammisassaqartitsinermut pisortaq Harald Bianco taama nalunaarpoq.
Tusarnaartitseqattaarnerit sapaammi ingerlaqqissapput tassani juullimut tusarnaartitsisoqassammat erinarsoqatigiit ’Inngeratsiler’ aamma ’Kangiata Akisunnera peqataassallutik. Juaaka Lyberth aamma Leif Immanuelsen juullimu tusarnaartitsinermi aamma erinnanik arlalinnik atuissapput.
Juaakap meeqqanut erinarsuusiai
Juaaka Lyberth aamma Leif Immanuelsen timersortarfimmi tusarnaartitseqqissapput ataasinngornermi ullaap tungaa atuartunut ilinniartitsisuinullu. Nipilersortartut taakku marluk Nuummeersut timersortarfimmut nipilersoriannginnerminni sivikitsumik utoqqaat illuanni tusarnaartitsissapput.
- Akustiskimik nipilersortarluta taallanik atuakkiannillu atuffassilaartarlunga aliikkusersuissaagut. Immikkut meeqqanut programmeqassaagut nammineq meeqqanut erinarsuusiarinerusarsimasannik. Qilanaarnaqaaq Tasiilami Inngeratsitillukkut allallu aliikkusersueqatigilaarnissaat. Neriuppugullu Kulusummut aamma iluatsissinnaassaalluta, Juaaka Lyberth oqarpoq.
Tipsernermit lottomillu iluanaarutinit kiisalu Air Greenlandip kulturillu illorsuata Katuap suleqatigiinnerisigut angalanissaq aningaasalersorneqarpoq. Aaqqissuussinernut Lions Club aamma aningaasaleeqataavoq kiisalu nipilersortartut taakku unnuiffissaannik Harald Bianco isumaginnittuulluni.
Juaaka Lyberth aamma Leif Immanuelsen marlunngornermi Kulusuliassapput silamit akornuserneqassanngikkunik. Pilersaarutaavoq ullukkut atuartunut Kulusumi tusarnaartitsinissaq unnukkullu inersimasunut pingasunngornermi Nuummut angerlannginnerminni.