meeqqat sammisassaat
Tasiilami Ittoqqortoormiinilu pinnguartarfinnik nutaanik sanasut
Kommuneqarfik Sermersooq Tunumi pinnguartarfinnik sisamanik sanassaaq
2016-imut missingersuutit ilaattut Tunumi nutaanik pinnguartarfiliornissamut Kommunalbestyrelse aningaasanik immikkoortitsisimavoq.
Nunatsinni illoqarfinni sukkanerpaasumik alliartortumi Tasiilami pingasut sanaartorneqassapput, Ittoqqortoormiinilu pinnguartarfik ataaseq.
Demokraateq nuannaartoq
Tasiilami illoqarfiup ilai pingasuusut tamarmik pinnguartarfeqalissapput. Taamaalilluni pinnguartarfiit najukkami katersuuttarfinngussapput illoqarfiup immikkoortuini uummarissaassutaasinnaasunik.
- Maannakkorpiaq meeqqat inuusuttuaqqallu kiffaanngissuseqarlutik pinnguarnissamut sammisassaqarnissamullu periarfissaqarpianngillat. Sammisassaqarnerulernerit aserorterinissamut, pinerlunnissamut aamma meeqqat inuusuttuaqqallu aangajaarniutinik atuilertarnerat annikillisaataasartut misilittakkat takutippaat, Poul Hansen (D) Meeqqanut, Ilaqutariinnut Atuarfeqarnermullu Ataatsimiititami siulittaasoq oqarpoq.
Atuaruk: Tasiilami sanaluttarfik nutaaq
BMX-ertarfik nuannarineqarluartoq
- Illoqarfimmi inuusuttuaqqat pinnguartarfiliornissatsinnut ikiorsinnaassagaatigut siunnersuutigaarput aamma kingusinnerusukkut BMX-inik sikkilertarfiliornissatsinnut, taamaalillutik illoqarfimmi inuusuttuaqqat piginneqataalernermik misigisaqarsinnaaniassammata, najukkami politikeri taama oqarpoq.
Tasiilami illoqarfiup qeqqa sunik tamanik iluatsilluarsimasumik multibanimik unammisarfeqareerpoq.
Læs: Sermersuup missingersuutit akerliusoqarani akuerai
Suliniummut katillugit 1,3 millionit koruunit pinnguartarfissanut pingasunut aammalu BMX-ertarfiliaasinnaasumut aningaasaliissutigineqarput.
Avannarpasinnerusumi apummik pinnguarneq
Ittoqqortoormiinut kommuni 125.000 koruuninik silamut naleqqussakkamik pinnguartarfiliornissamut immikkoortitsisoqarpoq.
Apingaatsiarsimagaluarpalluunniit pinnguartarfik atorneqarsinnaaneranik tamanna periarfissaqartitsissaaq.
Atuaruk: Tusagassiortoq tusaamasaq Ittoqqortoormiini tv-liortoq