Tasiilaq
Tasiilami inuusuttut nakuuserneq innarliinerlu akiorniarpaat
Nammineq timimut piginnittuuneremut qulakkeerinnittumik, nakuusernermik pinaveersaartitsisumik aamma toqqissisimalersitsisumik peqatigiiffimmi inuusuttut pilersitsiniarput
Inuusuttut eqimattat Tasiilameersut katersuullutik peqatigiiffimmik pilersitsiniarput, taanna illoqarfimmi meeqqanut inuusuttunullu toqqissisimanermik aamma atugarissaarnissamik pilersitsinissamik suliaqassaaq.
Taakku inuusuttut timiminnut, suiaassutsiminnut aamma kinguaassiiutit atornerat ukkatariniarpaat. Aammalu FN-ip kinguaassiornermut aamma pilersitseqqinnermut pisinnaatitaaffiit pillugit isumaqatigiissutaa, kalaallisuunngorlugu suli pissarsiarineqarsinnaanngimmat nutsertinneqassaaq.
- Tamatta akisussaaqataavugut, inuusuttut 12-t suliniuteqartut tusagassiuutinut nalunaarummi naqissusiipput. Innuttaasut, Kommuneqarfik Sermersooq aamma Namminersorlutik Oqartussat inuit pisinnaatitaaffii tunngaviusut qulakkeerniarlugit, timimut, suiaassutsimut aamma kinguaassiiutit atornerannut toqqissisimanermik pilersitsinissami akisussaaffimmik tigusinissaat, taakku kissaatigaat.
Workshop
Majoriami atuartut 40-t aamma sammisat pillugit workshopernermut peqataasimapput.
Meeqqanut inuusuttunullu 12-t aamma 25-t akornanni ukioqartunut workshoperneq ukiuni pingasuni suliniutaasumut ilaavoq, taassuma illoqarfinni Nanortalimmi Tasiilamilu inuusuttut akornanni akiuussinnaanerup aamma inoorusussutsip nukittorsarneqarnissaat siunertaraa. Suliniut ilisimatusarnermik ilaqarpoq.
Inuusuttut workshopernerminni kinguaassiuutit atornerinut nalunngisaqarnerulerput aamma killissanik ataqqinnilluni asannissinnaanermut paasisimasaqarnerulerput. Tamatumalu nakuusernerup aamma kinguaassiuutitigut kanngutsaatsuliornerit innarliinerillu pinaveersaartitsineq ukkassinerup siunertaraa, kiisalu peqqissumik pitsaasumillu atoqatigiittarnermik pilersitsinissaq.
Qullartartuliat
Sapaatip-akunnerata tulliani sila ajussanngippat, Tasiilap qulaani qullartartuliat nammineq sanaat takuneqarsinnaassapput. Nakuuserneq unitsittariaqaripput aamma tamanut pitsaasumik toqqissisimanartumillu inuunermi periarfissanik pilersitsisariaqartugut qullartartuliat allagartaqassapput.
Mexicomeersoq
Workshoperneq professorimit aamma klinisk psykologimit Cuauhtémoc Universitetimeersumit, Elena de la Casas Soberónimit, aamma Majoriami ilinniartitsisumit Anna Kuitse Kúkomit ingerlanneqarpoq.
Elena de la Casas Soberón Mexicomeerpoq, tassani arnanut meeqqanullu nakuusertarneq Kalaallit Nunaannit annertuneruvoq.
Suliniut 'Siunissaq uagut pigaarput' Bikubenfondenimit, Namminersorlutik Oqartussanit, Sermeqfondenimit aamma Nunafondenimit, Kommune Kujallermit kiisalu Kommuneqarfik Sermersuumit aningaasalerneqarpoq.