østgrønland
Tasiilami inuusuttunut tatitutunerulernissamut pikkorissarneq
Tasiilami Majoriami atuartut inuusuttut tatitunerulernissamut pikkorissarneq naammassivaat, inuunermi ilaatigut artornarsinnaasumi unammillernartut annikittuuppat annertuppataluunniit, qanoq iliuuseqarfigineqarsinnaaneri pillugit
Inuusuttut pikkorissarneqarneranni peqataasut 23-t ulluinnarni pissanganartutut isigineqarsinnaasut qanoq iliuuseqarfigineqarsinnaaneri, qanoq ajornannginnerusumik ilinniakkat tungaasigut pikkorinnerulersinnaaneq, inuunermi aqqusaakkat qanoq ajunnginnerusumik aqunneqarsinnaaneri taamatullu stressertarnerup akerleriittarnerullu qanoq pinngitsoortinneqarsinnaaneri ilinniarpaat.
- Inuusuttut Majoriami atuartut pikkorissarneqarneranni inuttut ajornartorisutaasa qanoq iliornikkut namminneerlutik aaqqiisinnaanerannik qanorlu iliornikkut ajornartorsiutit ilorraap tungaanut saatinneqarsinnaanerannik suliarineqarsinnaanerannillu ilinniartinneqarnissaat anguniagaavoq, Tasiilami Majoriami siunnersorti ilinniartitsisorlu, Julie Utuaq taama oqarpoq.
Ineriartorneq pitsaasoq
- Pikkorissarneq tunngavigissaarpoq tassami aamma kalaallit kulturitsinnut attuumassuteqarsinnaasut tassani ilaatinneqarmata, soorlu angajoqqaatsinnit kingornussatta avatangiisittalu qanoq uangutsinnut sunniisarnerisa allanngortinneqarsinnaaneri ilinniartitsissutigineqarmata, taanna oqarpoq.
Majoriami atuartut pikkorissarneqarneranni taakku tatitunerulersimaneri qanorlu inuunerisa ilorraap tungaanut allanngorneri takusinnaallugit, Julie Utuap nuannaarutigaa.
Ingerlariaqqissinnaaneq
Tatitunerulernissaq anguniarlugu pikkorissarneq, inuusuttunut Tasiilap eqqaani nunaqarfinneersunut assorsuaq iluaqutaasimavoq.
- Inuunermi qanorluunniit atugaqarsimagaanni tamassuma ilorraap tungaanut qanoq aallartinneqarsinnaanera aamma nuanniitsut qanoq nuannersunngortinneqarnissaat paasillugit atuartunut ilinniartitsisinullu assorsuaq oqiliallannarpoq, Julie Utuaq taama oqarpoq.