isumaginnittoqarfik
Tasiilami immikkut suliniutit ingerlaannassapput
Tasiilami ilinniarfimmik pilersitsinissamut periarfissat Naalakkersuisup misissorumavai
Ukioq kingulleq Naalakkersuisut Kommuneqarfik Sermersoorlu suleqatigiillutik Tasiilami immikkut suliniutit aallartippaat.
Immikkullu suliniutit ingerlaannassasut Ilinniartitaanermut, Kultureqarnermut, Ilisimatusarnermut, Ilageeqarnermullu Naalakkersuisoq Doris Jakobsen (S) tusagassiuutinut taama nalunaaruteqarpoq
Suliniutit ingerlaannarnissaat pisariaqartoq
Ukiup aallartilaarnerani marlunnik imminut toqutsisoqarnerata toqutsisoqarneratalu kingorna suliniutit ingerlaannarnissaannut peqqutaapput.
- Ajoraluartumik Tasiilaq ukiut ingerlanerini assigiinngitsutigut sakkortoorujussuarnik eqqugaasarsimavoq, taamaammallu immikkut iliuusissanik pisariaqartitsisoqarpoq, massakkorpiaq innuttaasunik ikiorsiissutaasinnaasunik, Doris Jakobsen (S) tusagassiuutinut nalunaaruteqarpoq.
Atuaruk: Kommunimi upalungaarsimasuutitat Tasiilamukartut
Suliat aallartinneqartut ilaat tassaapput angajoqqaanik pikkorissaaneq, atornerluisunik katsorsaaneq, qimarnguimmik pilersitsineq aamma inersimasunik meeraallutik kinguaasiutitigut atornerlugaasimanerminnik kingunerlutitsisunik sullissineq.
Tamakkua saniatigut kommunip susassaqartitsiniarnerinut tapiissuteqartoqarpoq.
Ilinniarfeqalersinnaaneranut periarfiissat
Tasiilami iliuusissanut periarfissaat annertusarniarlugit, misissuilluni suliaq maanna aallartissaaq Kommuneqarfik Sermersooq qanimut suleqatigalugu.
- Kisiannili aamma pisariaqarpoq ungasinnerusoq eqqarsaatigalugu qanoq iliuuseqarsinnaanerit misissussallugit ulluinnaat toqqissinartut qulakkeerniarlugit, Doris Jakobsen oqarpoq.
Tassunga atatillugu pingaartinneqassaaq susassaqarfiit akimorlugit ilinniartitaanikkut, kulturikkut, inuussutissarsiornikkullu ineriartortitsinissaq.
Ilaatigut misissorneqassapput naapertuuttumik nunap immikkoortuani atuuttussamik Tasiilami ilinniarfimmik pilersitsinissamut periarfissat.
Aammalu Tasiilami inuutissarsiutinik inerisaanermi, suliffissaqartitsiniarnermi piginnaanngorsaanermilu immikkut suliniutit qitiutinneqassapput.