Sermersooq
Tasiilami iliveqarfik allilerneqassaaq
Tunumi illoqarfimmi iliveqarfiup allilerneqarnissaanut Kommuneqarfik Sermersuumi Kommunalbestyrelse 2,5 millionit koruuninik immikkut aningaasaliissuteqarpoq
Tasiilami iliveqarfik mikivallaalersimavoq, taamaattumillu allilerneqarnissaa pisariaqarluni.
Taamaattumik alliliisoqarnissamut ukioq manna Kommunalbestyrelse 1,5 millionit koruuninik immikkoortitsivoq.
Naliliigasuarneq
Kommuneqarfik Sermersuumi Sanarfinermut Avatangiisinullu Ingerlatsivimmit naliliigasuarneq naapertorlugu, aningaasat immikkoortinneqartut atorlugit ukiut aappaata affaanit ukiut marluk tikillugit assaanissamut pisariaqartitsinermut taamaallaat matussusiisoqassaaq.
Taamaattumik Kommunalbestyrelsimit aalajangiunneqarpoq, alliliinissamut ukioq manna immikkoortinneqartussat 2,5 millionit koruuniussasut.
Kommunip aamma ilisimatitsissutigaa, aningaasat kommunip karsianit atorneqassasut taamaalillunilu 2016-imi pilersaarusiamut katillugit 4 millionit koruunit atorneqarnissaat qulakkeerneqassalluni.
Sulineq aallartereerpoq
- Qanigisanik ilisilluni misigissuseqarnartuuvoq, taamaattumik ilaquttat ikinngutillu annaasimasat iliveqarfinni ilisaaniarpata Kommuneqarfik Sermersuumi inissaqartinneqartuarnissaat innuttaasunit qularineqassanngilaq, Ado Holm (IA), Sanarfinermut Avatangiisinullu Ataatsimiititami siulittaasoq oqarpoq.
- Taamaattumik Tasiilami pisariaqartitsinerup sivisunerusumik piunissaa qulakkeerniarlugu ukioq manna immikkut alliliinissamut aningaasaliinissatsinnut aalajangerpugut, taanna ilanngullugu tusagassiuutinut nalunaarummi oqarpoq.
Tasiilami suliaq aallartinneqareerpoq qaammatillu tulliuttut marlussuit iluini naammassineqarnissaa naatsorsuutigineqarluni.
Tasiilaq pillugu allaaserisat tamaasa uani takukkit