avatangiisit
Tasiilami eqqaavissuaq tipiliorunnaangajalersoq
Tunumi illoqarfiup eqqaavissuanik pitsanngorsaaneq ingerlanneqaleruttorpoq, ukioq mannalu naammassineqarnissaa naatsorsuutigineqarpoq
Tasiilami eqqaavissuup tipinnera oqaluttuaannanngungajalerpoq.
Tassami Kommuneqarfik Sermersooq eqqakkanut qilertanut naqitsissumik pissarsimmat, taamaalilluni eqqakkat ikuallanneqarsinnaasut Nuummut ikuallaavimmut nutaaliaasumullu nassiussuunneqarsinnaalerlutik, kommuni tusagassiuutinut nalunaarummi taama allappoq.
Akikinnerullunilu mingutsitsinnginnerusoq
- Eqqaavissuup ulikkaartuaannarnerata allanngortinneqarnissaa pillugu aaqqiissutissanik arlalinnik ukiut ingerlaneranni misiliisaraluarluta tamanna iluatsinneq ajorpoq. Maannali tassa aaqqissutissamik pitsaasumik nassaareernitta kingorna tamanna ilorraap tungaanut aallaartinneqarpoq, Sanarfinermut Avatangiisinullu ataatsimiititaliap siulittaasua, Ado Holm (IA) oqarpoq.
Tasiilami eqqakkat qangaanerusoq ikuallanneqartaraluarput, taamaaliortarnerlu taamaatillugu eqqakkat Nuummut nassiussuunneqartarneri akikinnerusoq avatangiisinullu iluarnerusoq paasineqarmat eqqakkat poortoriarlugit Nuummut nassiussuunneqartalerput.
Eqqaavissuarmik pitsanngorsaaneq ingerlanneqaleruttorpoq, ukiormannalu naammassineqarnissaa naatsorsuutigineqarpoq.
Atuaruk: Eqqaavissuit amerlasuut salinneqassapput