Tasiilami eqqaavissuaq salinneqaleruttorpoq

Kommuneqarfik Sermersooq juunimi poortukkanut angisuunut naqitsissummik, ulluinnarni eqqakkanut assingusunik taaneqartumik angisuunngorlugit poortuissummik, pisaarmalli Tasiilami Materielgårdimi sulisut eqqaavissuarmi eqqakkat angisoorsuanngorlugit poortorpaat, tamakkualu kingorna Nuummut umiarsuaanneqassapput.

Poortugarsuit 300-t
– Poortukkanut angisuunut naqitsissut illoqarfimmut tikiunneqarmalli qaammatit pingasut ingerlaneranni eqqagassat ikuallajasut poortugarsuit 300-t missaanniittut poortorsimavagut, tamatumalu saniatigut containerit 50-it, saviminikunik, plastikkinik, pappinik eqqagassanillu ulorianartunik imallit Danmarkimut nassussimavagut, Tasiilami Materielgårdip pisortaa Ulrich Gaffuri tusagassiorfiunnut nalunaarutikkut paasissutissiivoq.

Ulrich Gaffurip naatsorsuutigaa eqqaavissuaq imaarneqarumaartoq sivisunerpaamik ukiut marluk ingerlaneranni.

Biilikut
Ullluinnarni eqqagassat kisimik katersorneqanngillat. Aamma saviminitoqqat biilikullu immikkoortiterneqassapput Danmarkimilu tuniniarneqassallutik.

– Ukioru issilerpat saviminikut atortullu allat biilitoqqaneersut, atoqqinneqarsinnaasut katersussavagut. Qaquguli tamanna naammassissaanerlutigu maannangaaq oqaatigisinnaanngilara, biilikorpassuaqarmat atortuinik ulorianartunik piiaaffigeqqaagassavut, Ulrich Gaffuri oqarpoq.

Sulisut tallimat eqqakkanik immikkoortiterinerinnavimmik poortugarsuarnullu poortuinerinnavimmik suliaqarput.

Namminersorlutik Oqartussat tapiissuteqarput
Suliniut atortut pissarsiarinerannut, suliffiup naleqqussarneranut kiisalu suliap aallartinneranut 2 millioner koruunit missaannik akeqarpoq - taakkunanngalu suliniummut Namminersorlutik Oqartussat 750.000 koruuninik tapiissuteqarsimapput, kommuni paasissutissiivoq.