meeqqat pinnguartut
Tasiilaami pinnguartarfik nutaaq
Pinnguartarfissanit sisamaasunit ataaseq siulleq nutaaq ammarneqarpoq
Kommuneqarfik Sermersuumi kommunalbestyrelsi 2016-imi sismanik pinnguartarfiliornissamut crossfitsertarfiliornissamullu aningaasanik immikkoortitsisimavoq. Siulleq Tasiilami meeqqanit atorneqalereerpoq.
Assit takukkit: Unnuap qeqqata tungaanut Tasiilami innuttaasunik ataatsimiisitsineq
Crossfitsertarfik
Tasiilap illoqarfiata avannaata tungaani crossfitsertarfissaq sananeqangajalerpoq. Tamaani inuusuttut inersimasullu silami sungiusarnissaminnut periarfissaqalissapput, crossfitertarfissaq maanna illup iluani kajumissutsimik sungiusartareersut sungiusartarfiisa eqqaanni inissinneqassammat.
Pilersaarutit naapertorlugit ingerlasoqassappat aamma sila ajunngeriarpat Tasiilami pinnguartarfik alla aamma sananeqassaaq. Pinnguartarfissaq illoqarfiup qeqqani multibanip saniani inissinneqassaaq.
– Meeqqat inuusuttuaqqallu qassinilluunniit ukiullit pinnguartarfinnik atuisinnaassapput, pinnguarneq qassinilluunniit ukioqaraluaraanni inuit akornanni ataqatigiinnermik pilersitsisarmat, Margit Weismann Kommuneqarfik Sermersuumi peqqissutsimut siunnersorti kommunip nittartagaa naapertorlugu oqarpoq.
– Taamaattumik pingaaruteqarpoq pinnguartarfinni pinnguaatinik assigiinngitsorpassuarnik ingerlatsinissamut atortussanik peqarnissaat, taamaaliornikkut atorluarneqarnissaat ornigarluarneqarnissaallu qulakkeerumallugit. Taakkua saniatigut pinnguartarfiit meeqqat inuussuttullu peqqinnartumik inooriaaseqarnissaannut pitsaasunillu ilikkagaqarnissaannut ilapittuuttaassapput.
Tasiilami crossfitsertarfiup saniatigut Ittoqqortoormiini pinnguartarfinnik sanaartornermik ingerlatsisoqarpoq. Kommuneqarfik Sermersuumit naatsorsuutigineqarpoq suliat septemberip naanerani naammassineqarnissaat.