Sisimiut
Taseralimmi aserortereqataasut suli ujaarineqartut
Sisimiuni kulturikkut illorsuarmi aserortereqataasut pingasut politiinit suli ujaarineqarput. Aserorterneqarsimasut 100.000 koruunit missaanni naleqartuusut oqaatigineqarpoq
Kulturikkut illorsuarmi aserorterisoqarsimaneranik politiit nalunaarfigineqarput pingasunngornermi januaarip arfineq aappaanni.
Matut pingasut-tallimat igalaasartallit aserorsimagaat aamma allanik aserugaqarsimasut politiit nalunaarutigaat. Illorsuup iluani immiaaqqanik allanillu imigassanik tillipput, it-mut aamma atortoq tiguaat kiisalu aningaasaasiviup iluaniittunik iluatsinngitsumik tilleriaraluarsimallutik.
Angut 21-nik ukiulik Sisimiut eqqartuussivianni killisiorneqareernermi kingorna politiinit ulluni 27-ni tigummigallarneqarnissaa aalajangerneqartoq, politikommisæri Karl Jørgen Lennert ilisimatitsivoq, tamannalu Sermitsiaq.AG-mit allaaserineqartareerpoq.
Sisimiuni politikommisærip Karl Jørgen Lennertip Sermitsiaq.AG-mut marlunngornermi oqaatigaa aserortereqataasut allat politiinit kinaassusaat ilisimaneqartuusut.
- Aserortereqataasulli sumiinnersut suli ilisimanngilarput, Karl Jørgen Lennert Sermitsiaq.AG-mut oqarpoq.