najugaqarfittaarneq
Tarnimikkut innarluutillit Nuummi najugaqarfittaassapput
Nutaamik najugaqarfissamik neqeroorummik pilersitsinissamik Kommunalbestyrelsip aalajangernerata kingorna, inuusuttut tarnikkut innarluutillit sisamat, Nuummut angerlarnissaminnut periarfissaqalerput
Inuusuttut tarnikkut innarluutillit sisamat Kommuneqarfik Sermersuumeersut, maanna Danmarkimi najugaqartut, angerlarnissaminnut periarfissaqalerput.
Kommuneqarfik Sermersooq ilisimatitsivoq
Kommuneqarfik Sermersuumi kommunalbestyrelsip 25. aggusti 2015 ataatsimiinnermini Nuummi pineqartunut najugaqarfimmik pilersitsiniarluni aalajangerpoq.
- Kommunitsinni innuttaasut kiffartuussinissamut pisariaqartitaannik neqeroorfigineqarsinnaanissaat pingaartippara. Tarnikkut innarluutilinnut neqeroorutit piffissami sivisuumi amigaatigineqarput, taamaattumik najugaqarfissaq una annertuumik siuariaataavoq, Kommuneqarfik Sermersuumi borgmesteri, Asii Chemnitz Narup (IA), oqarpoq.
Isumaginninnermut, Suliffeqarnermut Inuussutissarsiornermullu Ingerlatsiviup innuttaasut, maanna kommuneqarfiup avataani inissinneqarsimasut, attavigissavai, Nuummut angerlarnissaminnut kissaateqartut sisamat ujartorniarlugit.
Najugaqarfissaq nutaaq, aappaagu ukiup aallartilaarnerani ammarneqartussatut naatsorsuutigineqartoq, ataavartumik arfineq-pingasunik sulisoqalernissaa assigiinngitsutigullu ikorfartuisoqartussaasoq naatsorsuutigineqartoq, Aqqusinersuarmi inissisimassaaq.
Najugaqarfik nutaaq, iluarsartuunnera ilanngullugu, 3,7 mio. koruuninik akeqassaaq.
- Taamatut iliuuseqarneq sipaarniarnerunngimmat, erseqqissaatiginissaa pingaartippara, innuttaasulli innarluutillit ilaqutaasa qanittuani kulturikkullu ilisimasaanni, pitsaasumik najugaqarfimmik neqeroorfiginissaat kissaatigaarput.
Taamaattumik paaqqinnittarfinnut akisuunut atuisarunnaarnermut ukiumut sipaarutaasartussat taamaallaat 600.000 koruunit aamma 800.000 koruunit akornanniipput, taakkulu ukiumoortumik angerlarluni angalasarnernut allaffissornerusarnernullu aningaasartuutaasartut assigaat, Isumaginninnermut, Suliffeqarnermut Inuussutissarsiornermullu Ataatsimiititami siulittaasoq, Malene Lynge oqarpoq.
Tamatuma saniatigut angerlartitsinikkut illoqarfimmi suliffissanik pilersitsisoqassaaq akileraarutinillu isertitaqarnerusoqassalluni.