Tarnikkut nappaatinik isumaginninnermi meeqqanik pikkorissaasalernissaq isumaliutigigaa

Peqqissutsimut Naalakkersuisoq Doris Jakobsen Nunat Avannarliit oqaluttuarisaaneranni siullerpaamik tarnikkut nappaatit pillugit ataatsimeersuartoqarnerani Københavnimi tallimanngormat peqataavoq.

Tarnikkut nappaatit pillugit nunani avannarlerni ataatsimeersuarneq Danmarkimi peqqinnissaq pillugu ministerimit Sophie Løhdemit (V) siuttuuffigineqartoq Kronprinsesse Maryp ammarpaa.

- Maani Danmarkimi meeqqat 80.000-t missaat angajoqqaaqarput tarnimikkut nappaateqartunik. Tamatta tarnikkut nappaatilinnik nalunngisaqarpugut, tarnikkut nappaat immikkoortitsineq ajorpoq, kikkulluunniit eqqugaasinnaapput, kronprinsesse Mary Nunani Avannarlerni tarnikkut nappaatillit ilagisaasalu atugaat pillugit ammanerunissaq tapersersorneqarnerunissaannillu kaammattuuteqartoq oqarpoq.

Nunat tamalaat akornanni oqaloqatigiinneq

Anguniarneqartoq tassaavoq Nunani Avannarlerni misilittakkat pitsaasut aporfiusartullu ammasumik eqqartorneqarnissaat, suleqatigiinnerullu napparsimasunillu sullissinerup nunat killeqarfii akimorlugit siunissami pitsaanerulersinnissaa.

Nunat Avannarlerni tarnikkut nappaatit pillugit ataatsimeersuartoqarnerata inunnik tarnimikkut napparsimasunik ilagisaannillu pitsaanerusumik sullisinnissaq aqqutissiuussinnaavaa aammalu Kalaallit Nunaanni tarnimikkut napparsimasut ersarinnerulersillugit, peqqissutsimut naalakkersuisoq neriuppoq.

Meeqqanut katersuuffiit

- Angajoqqaanut, ilaqutaasunut qanigisaasunullu sulissussisarnerit nutaat pisariaqartippavut. Assersuutigalugu meeqqat tarnimikkut napparsimasunik angajoqqaallit meeraqatitik namminertulli napparsimasunik angajoqqaallit naapissinnaaniassagamikkik kiserliortutullu misigiunnaarniassammata katersuuffigisinnaasaminnik napiffigisinnaasaminnik peqalertariaqarput, Doris Jakoben, Københavnimi ataatsimiinnerup kingorna allanik aamma isumassarsiaqartoq, tusagassiuutitigut nalunaarummi oqarpoq.

Atuaruk: Eqqarsartaatsikkut napparsimasunut ilaqutaasut ikiorneqarnerunissamik kissaateqartut

- Nunatsinni aamma pisariaqartipparput meeraanermi ilaqutariinnilu ernumanermik nappaateqarneq akiorniassallugu. Assersuutigalugu tusagaqarpugut suliamik angajoq­qaat sakkussaminnik tunineqartut namminneq meeqqat ernumasut ikiorsinnaaniarlugit aammalu atuarfimmi atugassat tarnikkut napparsimasumik angajoqqaaqarneq. Tamanna misissorusuppara ilinniarfigisinnaaniassagatsigu, naggasiivoq Doris Jakobsen.

Doris Jakobsenip nalunaarutaani politikerip meeqqanut eqqugaasimasunut katersuuttarfimmik eqqarsaatit qanoq ililluni piviusunngortissinnaaneranik eqqarsarsimanera oqaluttuarineqanngilaq.

Atuaruk: Eqqarsartaatsimikkut napparsimasut Namminersorlutik Oqartussat inissiaataanni najugaqaqqusaanngitsut

Atuaruk: Ombudsmandip ineqarnermut naalakkersuisoqarfik isornartorsiorpaa