Tarnikkut ikiueqqaarnermi ilitsersuisartut 15-nit nutaat

Malunngormat tarnikkut ikiueqqaarnissamut pikkorissartut 15-it ulluni pingasuni pikkorissarnissartik aallartippaat. Pikkorissarneq, katillugu akunnernik 24-nik sivisussuseqartoq Nuummi sisamassaanik ingerlanneqarpoq.

Pikkorissarnermi pikkorissaasuuvoq Olav Øfverlind Pedersen, tarnip pissusaanut tunngasuni peqqissaasutut ilinniarsimasoq, ilitsersuisartunullu sungiusaasoq Qallunaat nunaanni nunatsinnilu Røde Korsip ataani KRK Julie Senderovitz Bendtsenilu.

- Qularutigineqassanngilaq tarnikkut ikiueqqaarnermi ilisimasat ullutsinni Kalaallit Nunaanni pingaarutilerujussuummata, sakkortuumik pisoqarnerani tarnip qisuariaatigisartagai inuppassuarnik qanigisaasunillu nalaanneqartartut ulluinnarni inuunerminni atortuagassanngortarlugit, pikkorissaanermi aaqqissuisut, Kalaallit Røde Korsiat allappoq.

Inoqatinik artorsartunik ikiuineq

Tassanngaannartumik tarnikkut ajornartoorutit "inunnut nalinginnaasunut” qilammit allaaqqissumik kallileriasaarneratut takkussinnaasarput, soorlu ajutoornikkut, inuunermik navianartorsiorluni nappaammik eeqqorneqarnikkut, toqusoqarneratigut, avinnermi, suliffimmi qinngasaarneqarnermi persuttarneqarnermiluunnit suliffimmiluunnit soraarsitaanikkut, paasissutissiarineqarpoq.

Tarnikkut ikiueqqaarnermi ilitsersuisutut pikkorissarsimasut pikkorissareernermik kingorna suleqatiminnut pikkorissaatitsinissaminnik neqerooruteqarsinnaapput qanoq inuunerminni ajornartorsiutitik aaqqiivigisinnaaneraat qanorlu inoqatitik artornartunik nalaataqartut ikiorsinnaaneraat

Pikkorissarnermi peqataasut: Anita Tørner, Narsaq, Anna Kûitse Kúko, Sialitsuk Aminaq, Kurt Rokholm Pedersen, Martha Brandt, Tasiilaq, Aqqaluliit Jensen Lynge, Panínguak Kristensen, Maniitsoq, Mia Olsvig, Markus E Olsen, Helene Kreutzmann, Nukànguak Lynge Andersen, Sisimiut, Erni Kristiansen, Ida Unger Løvgreen, Lars Jørgen Petersen og Nike Berthelsen, Nuuk.