Ladies Circle 72
Tapersersuiniarluni Nuummi katerisimaartitsinermi 167.319 koruunit katersorneqartut
Charity Dinner ingerlanneqarnerani akitinneqartoq minnerpaaq 550 koruuniuvoq. Aningaasat sinneqartoorutit Meeqqat Ikiortigit – Red Barnet Kalaallit Nunaat tunniunneqarput.
Ladies Circle 72-ip checki 167.319 kr.-nik aningaasartalik Meeqqat Ikiortigit – Red Barnet Kalaallit Nunaat’nut sisamanngornermi 30. marsi tunniuppai, Meeqqat Ikiortigit tusagassiuutinut nalunaarummini paasissutissiivoq.
Atuaruk: Meeqqanut inissinneqarsimasunut suliniut nutaaq
Aningaasat suliniummut ”Meeqqat tamarmik angerlarsimaffeqartussaatitaapput”-mut atorneqassapput. Suliniut meeqqat
angerlarsimaffiup avataanut inissinneqarsimasut angajoqqaaminnut ataavartumik pitsaasumillu attaveqarnerisa tapersersornerisigut meeqqat ineriartornerannut iluaqutaasussatut siunertaqartoq.
Nerilluarlutillu imigassartortut
Aningaasat Ladies Circle 72-ip ukiumoortumik Charity Dinnerimik aaqqissuussinerani, februaarip qaammataani ingerlanneqartumi, katersorneqarput. Qujanartumik Nuummi inunnik nuannisarumatooqarallartillugu aamma inuussutissarsiummik ingerlatallit eqeersimaarallartillugit katersuiniarnermi 167.319 kr.-t katersorneqarput. Katerisimaarnermi peqataasut nerinermut 550 koruunik akiliuteqarput taakkunanilu 200 koruunit tunissutigineqartarlutik.
- Meeqqat angerlarsimaffiup avataanut inissinneqarsimasut atugaasa pitsaanerulersinniarneranut atatillugu inuussutissarsiummik ingerlatallit aamma inuiaqatigiit annertuumik peqataanerat Meeqqat Ikiortigit nuannaarutigaat. Taakku annertuumik iliuuseqarnerisigut Meeqqat Ikiortigit suliassaqarfiup tamatuma annertusisamik suliniuteqarfiginissaanut qilanaaruteqarsinnaalerput, Meeqqat Ikiortigit paasissutissiivoq.