Tanbreezip aatsitassarsiornissamut qinnuteqaataa akuerineqanngilaq

Aatsitassarsiornissamut qinnuteqaateqarsimasup Tanbreeze Miningip qinnuteqaataa akuerineqanngilaq. Taamaasilluni qinnuteqaateqaqqippata tusarniaasoqaqqissaaq, ataatsimiisitsisoqaqqissaaq allanillu suliassaqaqqissalluni.

Tanbreez Killavaani Alannguanni Kujataaniittumi aatsitassarsiornissamik takorluugaqartut Namminersorlutik Oqartussanut nutaamik qinnuteqaasiortariaqalissapput.

- Tanbreez-ip tunisassiornerup pingasoriaatinngorlugu annertusitinnissaanik kissaateqarnerata kingunerisaanik VVM-imut aamma VSB-imut nassuiaammi suliassamut nassuiaat uppernassuseeruppoq, Naalakkersuisunit nalunaaruteqartoqarpoq.

Nassiussisoq nalunaarutigineqanngilaq
- Piiaanissamut qinnuteqaammik nutaamik, suliassamik tamakkiisumik nassuiaatinik imaqartumik, ilanngullugit VVM aamma VSB nutaat, nassiussinissamut Tanbreez periarfissinneqassaaq, tassani aallaaviusussanut paasissutissat soorunami atoqqinneqarsinnaassallutik.

Tanbreezimik kikkut itigartitsisuunersut allaqqanngilaq.

Naalakkersuisoqarfimmik naalakkersuisumilluunnit nassiussisumik oqaatiginnittoqanngilaq. Inuussutissarsiornermut, Suliffeqarnermut Niuernermullu Naalakkersuisoqarfik nalunaaruteqartuusinnaavoq, taakkumi aatsitassarsiorfinnik suleqateqartartuupput. Aatsitassarsiornermut Naalakkersuisoqarfik aamma nalunaaruteqartuusinnaavoq.

Aatsitassanik piiaarusuttut
Tanbreez VVM-imut aamma VSB-inut nassuiaammi aatsitassarsiorfiup suliassat aalajangersimasup immikkoortui tamarmik qinnuteqarnermini suliareqqittussanngussavai, qinnuteqaammili ilaareersut ilaat suli atorneqarsinnaasut nalunaarutigineqarpoq.

Tanbreez ulloq 9. august 2013 piiaanissamut qinnuteqaammik tunniussivoq. Qinnuteqaat 2013-imi aggustimiit 2014-imi januaarimut tamanut ammasumik tusarniaassutigineqarpoq aammalu tamatuma kingorna Aatsitassanut oqartussaasumit suliarineqarluni.

Tanbreez-ip allakkani 27. juli 2015-imeersuni, Inuussutissarsiornermut, Suliffeqarnermut Niuernermullu Naalakkersuisumut kiisalu Aningaasaqarnermut Aatsitassanullu Naalakkersuisumut ingerlatinneqartuni nalunaarutigaa ukiumut tunisassiortarnissap 0,5 mio. tonsinit 1,5 mio. tonsinut annertusitinnissaa ingerlatseqatigiiffiup kissaatigigaa.

Ataavartuusariaqartoq
Naalakkersuisut ima ullumi allapput:

- Naalakkersuisut isumaqarput, suliassaq avataaniit aningaasalersuisussarsinissamik angusaqarnissamut naammattumik ujarassiornikkut uppernarsarneqarsimanersoq aammalu suliassaq tunisassiornerup pingasoriaatinngortinneqarnerani avatangiisinut aamma inuiaqatigiinni piujuartitsisinnaanersoq paasinarsisinneqarsinnaalernissaanut, misissuinerit arlallit ingerlanneqarnissaat suli amigaataasoq.