aatsitassat

Tanbreez Naalakkersuisunik suli isumaqatiginninniarpoq

Aatsitassarsioqatigiiffik Tanbreez Mining Greenland, nunatta kujataani Killavaat Alannguanni 2001-imili aatsitassaqarfinnik misissuisimasoq, Naalakkersuisunut suli isumaqatiginninniarpoq

Aatsitassarsioqatigiiffik Tanbreez Mining Greenland, nunatta kujataani Killavaat Alannguanni 2001-imili aatsitassaqarfinnik misissuisimasoq, ilaatigullu nunarsuarmi nassaanit uppernarsarneqarsimasunit annertunerpaatut oqaatigineqartunik aatsitassanik qaqutigoortunik taaneqartartunik nassaareersimasoq, Naalakkersuisunik Kommune Kujallermillu suli isumaqatiginninniarpoq.

- Tanbreezip aningaasaqarnermut aatsitassanullu naalakkersuisoq nutaaq Demokraatineersoq Andreas Uldum qanittukkut januaarip qaammataani ataatsimeeqatigaa suliniutip killiffia, periarfissat aammalu suut suli Naalakkersuisut, Kommune Kujalliup Tanbreezillu akornanni isumaqatigiinniutigineqarnersut saqqummiunneqarlutik.

Taama Tanbreez Mining Greenland tusagassiuutinut nalunaaruteqarpoq.

- Isumaqatigiinniarnerni allaaviusoq tassaavoq aallaqqaataani ukiumut qaarsoq aatsitassartalik 500.000 tons piaarneqartassasoq ukiullu ingerlaneranni ukiumut 3,0 millioner tonsinut annertusineqarsinnaasoq. Tamanna tunngavigalugu naatsorsuutigineqarpoq sulisussat aatsitassarsiornermi toqqaannartumik suliaqartussat 230 missaat atorfissaqartinneqassasut, suliallu sunniutissai allat ilanngullugit suliffissanik 500-nik pilersitsisoqarsinnaasoq. Taamaalilluni pilersaarutigineqartoq akunnattumik annertussuseqassaaq, pisariunngitsoq kingunissalimmillu suliniutaasoq, taamatullu pingaartumik Nunatta kujataani inuussutissarsiornikkut aningaasarsiornikkullu ineriartornermut pitsaasumik kinguneqarsinnaassalluni, Tanbreezermiut taama nalunaaruteqarput.

Atuaruk: D: Aleqap Tanbreez itigartippaa?

Kuupik Kleist siunnersortaalerpoq
Aatsitassarsioqatigiiffimmit nalunaarutigineqartut naapertorlugit maannamut aningaasat 300 millioner koruunit (amerikamiut dollariinik 40 millionit) missaat Killavaat Alannguanni misisusinermut atorneqareerput, ingerlatseqatigiiffiullu naatsorsuutigaa Nunatta kujataani suliffissanik nutaanik amerlasuunik pilersitsinissamut periarfissaqarluartoq, suliffiillu taakku amerlanersaat nunatsinneersunit inuttalerneqassasut.

- Tanbreezimit neriuutigineqarpoq isumaqatigiinniutigineqartut pillugit paaseqatigiittoqarlunilu isumaqatigiittoqarsinnaassasoq, soorlu aamma piiaanissamut Naalakkersuisut ukiup 2015-ip ingerlanerani akuersissuteqarsinnaassasut upperalugulu neriuutigigipput.

Tanbreezip nunatsinni suliaqarnini nukittorsarusullugu aamma innuttaasunut, Kommune Kujallermut, Naalakkersuisunut suleqatigisartakkanullu allanut attaveqarneq aneertusarusullugu, siunnersuisartut Group Greenland suleqatiginnissamik aammalu Kuupik Kleist siunnersortitut isumaqatigiissuteqarfigisimavaat.

Powered by Labrador CMS