Hash

Talittarfinni haship akiorniarneqarnera Siumup nukittorsarniarpaa

Haship anngiortumik eqqussorneqarneranut iliuuseqarneq Siumup Naalakkersuisunut ilanngaaserisut nakkutiginninnerat nukittorsartinniarpaa.

Haship umiarsuartigut anngiortumik eqqussorneqarneranut iliuuseqarneq nukittorsarneqassaaq.

Talittarfinni ilanngaaserisut misissuinerat qanoq nukittorsarneqarsinnaaneranut periarfissat piumasaqaatillu pillugit Naalakkersuisut nalunaarusioqqullugit peqqussuteqartut, Siumup Inatsisartuni gruppia aalajangiiffissatut siunnersuuteqarsimasoq taama isumaqarpoq.

- Ukiuni amerliartuinnartuni nunatsinni ajornartorsiut oqallisigisarput ikiaroornartup eqqussuunneqarnera siunissatsinnik innarliiartuinnartoq allanngortinneqartariaqarpoq, siunnersuummut tunngavilersuummi tamanna allaqqavoq.

Polar Nanoq
Bírna Brjánsdóttirip toqutaaneranut misissuinermut atatillugu Islandimiut politiivisa Polar Nanormi hashimik 20 kiilumik nassaartoqarnerata kingorna, ikiaroornartup anngiortumik umiarsuartigut eqqussorneqartarnerat pillugu oqallinneq aallarteqqippoq.

Aamma atuaruk: Kilisaatit ikiaroornartulerisunik inuttallit akuersissutaarneqartalernissaannik Enoksen sioorasaarivoq

Tassani aalisarnermut naalakkersuisuusimasoq, Hans Enoksen (PN), umiarsuarni hashimik nassaartoqartillugu kilisaataatillit pillarneqartarnissaat nalunaarutigaa.

Nuummi ilanngaaserisut misissuinerusulissasut
Siumup gruppiata ilanngaaserineq nukittorusunneruaat. Nuummi talittarfittaaq ingammik tikkuarpaat, tassani ilanngaaserisut misissuisarnerat nukittorsartikkusuppaat.

- Nuuk isaavittut atorneqarnerani ilanngaaserisut suliarissarissavaat Avataasiorlutik aalisartut tamaasa nunatsinneerpata allamiuuppataluunniit tikinneranni avalalernerannilu, amma imarpikkut assartuutit takornariartaatit nunatsinnut apuunneranni misissorneqartarnissaat, siunnersuummi allaqqavoq.

Nunarput tamakkerlugu maanna ilanngaaserisut arfinillit atorfeqartinneqarput.

Ilanngaaserinerup kisimi aaqqissinnaanngikkaa
Aningaasaqarnermut akileraartarnermullu naalakkersuisoq, Aqqaluaq B. Egede (IA), taamatut immikkut nalunaarusiornissaq isumassarsiatsialaanngitsoq isumaqarpoq, tassa eqqussuinermut, tuniniaanermut aamma atornerluinermut ajornartorsiut ilanngaaserisuinnarnit aaqqinneqarsinnaanngitsoq ataatsimut isigineqartussaasoq isumaqarami.

Aamma atuaruk: Nunatsinni ilanngaaserisut arfinillit haship eqqunneqarnissaa pinngitsoortissinnaanngilaat

Hashimut pilersaarummik aallartitsisoqarsimasoq taanna innersuussivoq, allanillu nutaanik iliuuseqarniaraanni taanna atuuteqqaassanerarpaa.

- Hashi akiorniarlugu nuna tamakkerlugu iliuusissatut pilersaarummi 2016-imeersumi ajornartorsiuteqarfiit akornanni suliniartoqarpoq, tassanilu ilanngaaserisoqarfik pillugu immikkut immikkoortortaqarpoq. Iliuusissatut pilersaarummi ilaatigut peqqinnissaqarfimmi, ilinniarfeqarfimmi, inatsisinik atuutsitsinermut tunngassuteqartuni oqaatigineqareersutullu ilanngaaserisoqarfimmi suliniutit arlallit, taakkunani umiarsualiviit mittarfiillu isiginiarneqarlutik nassuiarneqarput, akissuteqaatimini allappoq.

Sikuki Harbourimut atortut nutaat isumaliuutigigaat
Aqqaluaq B. Egedep aamma mittarfimmi misissuinerit nukittorsarneqarsimasut maluginiaqquaa, Kangerlussuarmi timimut skannerimik pisisoqarsimammat.

Matuma saniatigut Akileraartarnermut Aqutsisoqarfik atortunik allanik, ikiaroornartut katitigaanerannik ilisarinnissinnaasunik, Sikuki Nuuk Harbourimi ilanngaaserinermi atorneqartussatut eqqarsaatigineqartumik pisissalluni eqqarsaatersuuteqarpoq, taanna allappoq.

Tamanna tunuliaqutaralugu talittarfinni iliuuseqarneq nuna tamakkerlugu hashimut akiuniarnermut pilersaarutip peqatigisaanik suliaqartoqassasoq, allannguutissatut siunnersuuteqarpoq.

Siunnersuutit ullumikkut Inatsisartuni siullermeerneqassapput.

Powered by Labrador CMS