Takussutissaq: Ulloq siulleq imatut ingerlavoq

Sermitsiaq.AG-p siusinnerusukkut allaaserisaatut kalaallit arsaalluni nunanut allanut unammisartut Menorcamut unammigamik naligiiginnarput.

Triatlon-ertartullu sapaatiummat unamminermi angusarissaarput.

Sermitsiaq.AG-p timersuutini allani angusat ilannguppai.

Bordtennis:

Holdikkaarluni unamminerit sapaatiummat aallartinneqarput. Gruppimi unamminermi siullermi Savalimmiut 6-1-imik ajugaaffigineqarpoq. Unamminerup aappaani Menorca 7-0-imik ajorsarujussuartinneqarpoq. Sapaatiummallu unamminermi kingullermi holdi Guernsey-mut 2-5-imik ajorsarpoq.

– Unammisartut unammilluaqaat. Sukkasuumik unammipput. Holdi semifinalimut anngussinnaavoq. Gruppimi unamminermi kingullermi holdi sanngiinnerpaaq, Shetlandsøerne, unammissavarput. Unamminermi ajugaaniassaagut, ajugaassaguttalu semifinalimut anngunnissarput qanittuararsuanngussaaq, nunanut allanut unammisartut sungiusaasuat Tommy Jørgensen Sermitsiaq.AG-mut oqaluttuarpoq.

Badminton:

Holdikkaarluni unamminermi siullermi Kalaallit Nunaata Falklandsøerne 5-0-imik ajugaaffigaa. Gruppimi unamminerup aappaani holdi ilimagineqarnerpaamut Jersey-mut 0-5-imik ajorsarpoq.

– Unammisartut kakkannerit unammivagut. Angutit kisimiilluni unamminermi unammilluaqaat. Bror Madsen sivisoorujussuarmik unamminerup kingorna sæt-ini 2-0-mik ajorsarpoq. Unammisartulli tamarmik unammilluaqaat, arlallillu Jerseymeersumut ajugaangajavitttarput. Medalje-nanniarsinnaajunnaarpugut. Ataasinngornermi holdikkaarluni unamminermi 5. - 8.-ngorniutissaagut, nunanut allanut unammisartut sungiusaasuat Rune Svenningsen oqarpoq.

Holdip unammissavaa Gotland. Tassani ajugaasut normu 5-inngorniutissapput.

Attaasiakkaarluni unammiuaarnerit marlunngorpat aallartissapput.

Arnat arsaattartut:

Kalaallit arnat arsaattartut gruppimi unamminermi siullermi angerlarsimaffimminni unammisumut Jerseymut 2-3-mik ajorsarput. Unamminerup immikkoortua siulleq naammat kalaallit 0-2-mik kinguarsimapput, unamminerulli immikkoortuata aappaani sukataarput 2-2-mullu anngukkaluarlutik.

– Unamminerulli naammassinissaa sekundinik 30-iinnarnik sioqqullugu Jersey ajugaassutissaminik isertitsivoq. Unammineq tamaat holdit saassusseqattaarput. Unamminerup immikkoortuani siullermi unammisartut annilaangapput, muminnerulli kingorna takutitsilluarlutik. Holdit marluullutik periarfissarpassuit maangaannartittarpaat, akersuunnerpassuaqarporlu. Unammisartut soorunami pakatsipput, tassami minnerpaamik pointinik ataatsimik pissarsiniaraluaratta, arnat arsaattartut nunanut allanut unammisartut sungiusaasuat Bent Petersen oqarpoq.

Arnat nunanut allanut unammisartut ataasinngorpat Hitra unammissavaat.

Golfertartut kalaallini peqataasuni kisiartaallutik suli unamminngillat. Golferluni unammiuaarneq marlunngorpat aallrtissaaq.

Island Games tallimanngornermi juulip 3-anni naassaaq.