sumiginnaaneq

Takusinnaaviuk?

Peqatigiiffik Kalaallit Meerartaat sumiginnaaneq ukkataralugu Upernavimmi Uummannamilu workshoppertitsissapput.

Meeqqamik qanoq sumiginnaasoqartarpa? Qanoq isilluta sumiginnaasoqarnersoq paasissavarput? Meeraq toqqissisimatinnagut ilaqutariillu ajornartorsiuteqartillugit qanoq iliuuseqassaagut ikiuullutalu? Oqallissaarutitut filmeeraliami "Takusinnaaviuk?" apeqqutit tamakku takuneqarsinnaapput.

Filmi workshoppertitsinerni marlunni Peqatigiiffik Kalaallit Meerartaat aaqqissuisoralugu takutinneqassaaq. Workshoppertitsineq siullermik Upernavimmi pingasunngornermi 30. august ingerlanneqassaaq. Tullissaanillu sapaatip akunnerata tulliani Uummannami marlunngornermi 5. september ingerlanneqassaaq. Illoqarfinni taakkuni meeqqanik sullissisut ilinniarsimasut – ilinniartitsisut, perorsaasut, perorsaasut ikiortaat, isumaginnittoqarfimmi sulisut – akeqanngitsumik workshoppertitsinissamut aggersarneqarput. Allallu aamma soorlu politiit peqqinneqarfinnilu sulisut tikilluaqquneqarput.

- Suliamut ilinniarsimasut workshoppeqarfigeqqinnissaat qilanaaraarput – ingammik meeqqanut inuusuttunullu suliallit suleqatigiinnissaannik attaveqatigiinnermullu pilersitseqataaffigisinnaangatsigut. Workshoppertitsisarsimanitsinnimi ilisimavarput sulisut eqqartugassat pingaarutillit soorlu sumiginnaaneq angajoqqaajunerlu pillugit eqqartuinissaannik periarfissaalluartoq, Peqatigiiffik Kalaallit Meerartaanni, børnefaglig konsulenti Helle Skriver Andersen oqarpoq.

Powered by Labrador CMS