Takornarissat piniartuiunngitsut piumanngilaat

Tunumi piniartut inooriaasiat Unescomit nalunaaqutserneqassappat, takornarissat tikerarnissaat politikerit neriuutigaat. Piniartulli aatsaat misigisassanik piviusunik neqerooruteqarsinnaappata aatsaat tamanna pissaaq, misigisassallu parkimi nuannaarniartarfimmut assingusuunngippata.

- Piniartut inooriaasiat nunarsuarmi eriagisassat allattorsimaffiannut ilanngunneqassappat, takornarissat ilisarisinnaasaattut ilisarnaatinngussaaq, kisianni angalaffigissallugu soqutiginartissagaanni, misigisassat neqeroorutigineqartut tatitiginartuussapput. Piviusuusariaqarput, lektori Carina Ren oqarpoq, taanna Aalborg Universitetimi 'Kalaallit Nunaanni takornariaqarnermik ineriartortitsinermik' ilisimatuussutsikkut misissuinermik suliniummik maanna ingerlataqarpoq.

Takornarissat aliikkusersorniarlugit aalisartuusaarlunilu piniartuusuusaaraanni iluaqutaanngilaq.

Atuaruk: Tunup ilisarnaataa UNESCO-mi allattorsimaffimmut ilanngunneqarusuttoq

Kommuneqarfik Sermersuumi kommunimi politikerit pingasut, Asii Chemnitz Narup (IA), Justus Hansen (D) aamma Vittus Mikaelsen (S), Tasiilap eqqaanilu piniartut immikkuullarissumik kulturiat UNESCO-p nunarsuarmi eriagisassanut allattorsimaffimmut ilanngussinnaanerannut periarfissat misissorneqarnissaat piumasaraat.

Takornariaqarneq taamatullu nunap aningaasaqarnerata nukittorsarneqarnissaat ilaatigut siunertaavoq.

- UNESCO-p nunarsuarmi eriagisassanut nalunaarsuiffiani ilanngunneq aamma Kalaallit Nunaata malugineqarnissaanut annertuumik malunnartumillu periarfissiissaaq aamma takornarianik kinguneqartoq taamaalillunilu siunissaq ungasinnerusoq eqqarsaatigalugu ineriartortitsinermik pilersitsisussaq taamatullu Tasiilami assissaqanngitsumik avatangiisilimmi taassumalu nunaqarfiini inuussutissarsiornermik periarfissiissalluni, tamanna politikerit siunnersuutaanni kommunalbestyrelsip kingullermi ataatsimiinnerani akuerineqartumi atuarneqarsinnaavoq.

Tunup Islandimut qanilluni inissisimanera takornarianik amerlanerusunik pilerisutsitsinissamut periarfissaqartitsivoq. Kisianni takornarissat avannaanut aallartartut, takornarissanit allanit narrutunerusarput.

- Taamaattumik sumiiffimmi najugaqartut aallaqqaaterpiaanit peqataasinneqarnissaat pingaaruteqarpoq, taamaalillutik neqeroorutit misigisassallu suut ineriartortinneqassanersut aalajangiiffigisinnaaniassammassuk. Takornarissat tikisinnissaat iluatsikkunikku sulerissanersut isumaliutigissavaat, taamaanngippat najugaqartut aningaasarsiornissamut periarfissaq annaassavaat, Carina Ren oqarpoq.