aliikkutaralugu aalisarneq
Takornarissanut eqalunniarfigineqarsinnaasut arfineq pingasut
Eqalunniarfigineqarsinnaasut nutaat pingasut eqalunniarfigineqarsinnaalernerat Naalakkersuisut akuersissutigaat
Qeqqata kommuniani eqaloqarfinni pingasuusuni qissattarluni eqalunniartitsinissamut akuersissutit Naalakkersuisunit nalunaarutigineqaqqammerput.
Ukiup ataatsip missaa qaangiuppoq eqalunniarfinnut tallimanut akuersissutit nalunaarutigineqarmata, taamaalilluni Qeqqata Kommuniani eqalunniartarfissatut immikkoortitani 16-iusuni eqalunniarfissat arfineq-pingasuusunut akuersissutit tunniunneqalereerput.
Inatsit naapertorlugu sumiiffinni inunnut suliffeqarfinnullu akuersissutit tunniunneqarput.
- Eqalunniarfinnik akuersissutinik tunniussisarnermi suliniutaasup siunertaa tassaavoq, nunarsuarmi immikkoortuni allani qissattartitsilluni aalisartitsinermik ingerlataqarfiit ilisimaneqartut assingisut pilersitsinissaq, Qeqqata Kommunia tusagassiuutinut nalunaarummini allappoq.
Qeqqata Kommuniata erseqqissaassutigaa, nunatani qissattartitsilluni eqalunniartitsinermut akuersissuteqarfiusuni, innuttaasut najugaqavissut nunatamik atuinissaannut killilersuinngimmat. Innuttaasut najugaqavissut pisarnermisut eqalunniarfinni aalisarsinnaatitaapput.
- Immikkuullarissumik misigisaqartitsinissamik kiisalu takornarissanut pitsaasumik attaveqalernissamut, ineriartornermik suliffissanillu kinguneqartumik killiliussatut atugassarititaasunik pilersitsinissamut ikiuunnissaq siunertaavoq, kommuneqarfik nangilluni allappoq.
Kangerlussuarmi tammajuitsussarsititsiniarluni piniartitsisarnissamut akuersissutinut qinnuteqarnissamut atortut siunissami qaninnerusumi nassiussorneqarnissaat naatsorsuutigineqarpoq.
Maniitsup avannaatungaani sisorartitsilluni nunatanut assigiinngitsunut aqqaneq-marluusunut akuersissutit pillugit, kommuneqarfiup suliniutaanut ilaavoq.