takornariaqarneq

Takornariat tikeralinnginnerini misissuinermi akunnittarfiit angusipput

HORESTA-p akunnittarfiit qulingiluat misissoqqammerpai akueralugillu

Ilulissani akunnittarfiit sisamat ilagaat ullorissanik sisamanik nalilerneqartut Hotel Arctic

Danmarkimi akunnittarfinnut, neriniartarfinnut takornariaqarnermullu kattuffiup HORESTA-p akunnittarfiit qulingiluat misissoqqammerpai, akunnittarfinnik naliliinermi Hotelstars Unionimi ilaatinneqartut.

Misissuinermi akunnittarfiit tamarmik pitsaassutsimut kiffartuussinermullu piumasaqaatit naammassivaat, takornariaqarnermik siunnersuisoqatigiiffik Visit Greenland paasissutissiivoq.

Pingasut sisamanik ullorialerneqarput

Taamaasilluni Kalaallit Nunaata suli tulluusimaarutigisinnaavaa akunnittarfiit pingasut sisamanik ullorialerneqarnerat, akunnittarfiillu arfinillit pingasunik ullorialerneqarlutik.

Akunnittarfiit makkuupput:
Hotel Qaqortoq - ullorissat 4
Nuuk Sømandshjem & Hotel - ullorissat 3
Aasiaat Sømandshjem & Hotel - ullorissat 3
Hotel Icefiord - ullorissat 3
Hotel Arctic - ullorissat 4
Sisimiut Sømandshjem og Hotel - ullorissat 3
Hotel Sisimiut - ullorissat 3
Hotel Hans Egede - ullorissat 4
Hotel Maniitsoq - ullorissat 3

Nunat 15-it

Aaqqissuussineq atorneqarpoq europami nunanit 15-init, assersuutigalugu Tykslandimit, Sverigemit Schweizimillu - tikeraallu qulakkeeriffigineqarput akunnittarfiit kiffartuussinikkut, pitsaassutsikkut neqeroorutitigull nunani tamalaani malittarisassanik assigiissunik naammassinnittut.

Takunnissinnaaneq

– Nukittorsaataavoq akunnittarfivut maanna europami ataatsimut aaqqissuussineq malillugu nalilerneqartarlermata. Tamanna tikeraanut pitsaassutsimut qanoq naatsorsuutiginninnissaannut takunnissinnaalersitsivoq. Naliliinerullu ersarissumik takutippaa nunatsinni akunnittarfiit nunani tamalaani akunnittarfinnut sanilliunneqarsinnaasut, Visit Greenlandimi pisortap tullia Anders la Cour Vahl tusagassiorfinnut nalunaarutikkut erseqqissaavoq.

Powered by Labrador CMS