Vest Norden Travel Mart
Takornariartitsisartut 35-t Islandimit ingerlaqqinnaveertut
Takornariartitsisartut saqqummersitsinerat annertooq, Vest Norden Travel Mart, Nuummi ullaaq aallartinneqartoq, timmisartumik ajoquteqartumut eqqugaaqqavoq. Takornariartitsisartunit hunnorujulikkaanit peqataasussat 35-t Islandimit suli tikinngillat.
Takornariartitsisartut ingerlariaqqinnaveertut unnuaru Nuummut tikinnissaat naatsorsuutigineqarpoq, taamaalillutik ataatsimiinneq marlunngornermi inuussutissarsiornermut naalakkersuisumit Hans Enoksenimit ammarneqartoq peqataaffiginngitsuussavaat. Islandimit Nuummut timmisartut sisamaasunit ataaseq ajornartorsiuteqarsimavoq.
Saqqummersitsineq angumerissavaat
Takornariaqarnermik suliaqartut 35-t taakku saqqummersitsineq, Inussivimmi pingasunngornermi pisussaq angumerissavaat.
Nunatsinni takornariaqarneq sukkasuumik ineriartortoq, Hans Enoksenip takornariartitsisartunut ammaanersiornermi oqalugiarnermi oqaatigaa, tamannalu aalisarnerup saniatigut nunamut pingaaruteqaleriartuinnartussaanerarlugu.
Vest Norden Travel Martip ukiut sisamat qaangiuppata ingerlanneqaqqinnissaanut qilanaassaaq. Piffissami tassani Europamit aamma USA-mit timmisartukkut aqqutinik pilersitsisoqareerniartussaammat.
Mittarfiit nutaat takornariarnermik nukittorsaassapput
Takornariartitsisartut nunanit allaneersorpassuit nutaanik mittarfiliornissamut pilersaarutit nassuiaatigaat, taakku Nunatsinni takornariaqarnermut nukittorsaataangaatsiassapput.