takornariat
Takornariartitsineq ukioq manna siuariartoq
Takornariat nalaat suli qaangiutinngilaq, takornariartitsinerulli siuariarnissaanut suut tamarmik isumallualersitsipput. Tunu kisimi kinguariarfiusoq paasinarsivoq, angallassinerup killeqarnera tamatumunnga patsisaasoq, Visit Greenlandimit oqaatigineqarluni
Takornariat Islandimukartartut ukiumut 2 millionit missaanniittut, qeqertami tassani naalagaaffimmi tunisat ataatsimut nalingisa 10 procentiannik isertitsissutaasartut angusinnaanissaat suli ungaseqaaq. Ukioq mannali aamma amerleriaqqinnissaat ilimanaateqartoq Visit Greenlandimit oqaatigineqarpoq, taakku takornariartitsinermik ingerlataqartut toqqartukkat 13-it Kujataaniittut, Qeqqaniittut, Avannaaniittut Tunumiittullu apersorsimavaat. Kingullertut taaneqartoq eqqaassanngikkaanni amerleriaateqarluarneq aamma marlunnik kisitsisitalinnik procentinik amerleriaateqartoqarnera oqaatigineqarpoq.
AG allappoq.
- Tatiginartunik kisitsisaateqanngilanga. Qanoq inerneqarnissaat oqaatigissallugu piaarpallaaqaaq, tassami maanna takornariaqaleruttornerata naligaa. Amerleriaateqarneralli maluginiarpaat. Soorlu Ilulissani unnuisarfinni ataasiakkaani juulimi unnuisut 4-6 procentinik amerleriaateqarsimapput, Visit Greenlandimi pisortap tullia Mads-Daniel Skifte oqarpoq.
Nuummi aamma periarfissarpassuit ukiuni arlalinni tunuarsimaarfigineqarsimasut takornariartitsinermi akuulersimapput.
- Nuummi amerleriaateqartoqangaatsiarnera misinnarpoq. Tamanna pitsaalluinnarpoq. Islandimiut takornariartitsisartut Nuup eqqaani periarfissanik takunnissimanerat tamatumunnga patsisaavoq. Sisimiuni aamma Arctic Circle Trailimit Kangerlussuarmut pisuttartut ajunngivissumik 20 procentit missaannik amerleriarsimapput, taanna oqarpoq.
Siuariaritorneq pillugu AG aviisimi paasisaqarnerusinnaavutit. Aviisi uani pisiariuk.