umiarsuit takornariartaatit
Takornariartaatit ilaasuinut akileraarutaasoq qaffasinnerusariaqartoq IA sinnersuuteqarpoq
Kalaallit Nunaanni takornarianut akitsuusiinikkut akileraarutit pillugit Inatsisartuni allannguutissatut siunnersuutip pingajussaanik ataatsimiissutigineqannginnerani Inuit Ataqatigiit siunnersuuteqassapput
Takornariartaatsit ilaasuinut akitsuusiinikkut akileraartarnerannut atatillugu Inuit Ataqatigiit allannguutissatut siunnersuuteqalerpata naatsorsuutigineqanngilaq illuatungiliuttut siunnersuutaat amerlanerussuteqarluni taaneqassasoq.
Naalakkersuisut allannguutissatut siunnersuutaat pingajussaaneerlugu ullumi marlunngornermi oqallisigineqassaaq.
Siullermik apriilip 16-ani oqaluuserineqarmat Inuit Ataqatigiit aamma Partii Naleraq siunnersuummut akuersinngillat.
- IA-miit umiarsuarni takornarianik angallassisut aningaasartuutaannik appariartitsinissaq akerlerinngilarput. Ullumikkut aningaasartuutit annertuallaartut isumaqatigaarput. Aappaatigulli suut tamaasa tunniutiinnassanngilagut imaluunniit inatsit eqquinerluttussaq akueriinnassanngilarput. Tamannarpiaavorlu IA-miit isornartorsiugarput, Inuit Ataqatigiit tunuliaqutaralugit Inatsisartuni ilaasortaasut Aqqaluaq B. Egede aamma Naaja Nathanielsen allapput.
Siunnersuutigineqartumit 50 oorimik qaffaaneq
- Nunatta avammut nittarsaanneranit 1,6 million koruunit sipaarneqarnissaannut partiit tamakkerlutik isorinnissimapput. Taamaattumillu IA-miit tikkuarsimavarput siunnersuutip matuma allanngortilaarneratigut 1,6 million koruunit taakkua pigiinnarneqarsinnaasut, Aqqaluaq B. Egede aamma Naaja Nathanielsen nassuiaapput.
Taamaattumik akitsuutip 1 koruuni 60 oorinut qaffanneqalaarnissaanut allannguutissatut siunnersuuteqarput, tassami Naalakkersuisut 1 koruuni 10 ooriunissaanik siunnersuuteqarput.
Taamaasilluni nunatta avammut nittarsaannissaanut aningaasat ilarujussui peerneqaannarsinnaasut siunnersuuteqarput. Peqatigitillugulu umiarsuit takornarianik angallassisartut nunatsinnukarusulernissaannut pilerisaarsinnaallutigit.
- Neriuppugut allannguutissatut siunnersuuterput Inatsiartunit tapersersorneqarumaartoq, tassa inatsimmut naapertuullunilu nunatta avammut nittarsaannissaanut suli aningaasassaqarnissatsinnik qulakkeerinnissammat, IA-mit oqaatigineqarpoq.
Takornariartaatinut akitsuut atorunnaassaaq
Umiarsualivinni akileraarutitigut akitsuusiinissaq pinagu takornariartaatsini akileraarutitigut akitsuut atorunnaartinneqarnissaa Inatsisartuni aalajangiiffigineqartussanngorpoq. Takornariartaatinut akileraarutitigut akitsuut atorunnaarsinneqarnissaa naatsortuutigineqarpoq.