takornarialerineq
Takornariartaassuit ussatitsinerat: Nunatsinnut angallasserusuttut amerlavallaanngitsut
Seatrade Medimi Barcelonami takornariartaassuit ussatitsineranni assigiinngitsunik paasisaqarfiuvoq
Takornariaassuit Nunatsinnukartartut ukiuni kingullerni ikiliartorput. Tamanna Kalaallit Nunaata kujataani malunnaateqartoq, Visit Greenland nalunaaruteqarpoq.
Destination Sagalandsimi Qaqortumi piginnittoq Pitsi Høegh Kommune Kujallermi Royal Arctic Logistics aamma Blue Water Greenland peqatigalugit takornariaassuit ussatitsinermi Seatrade Med Barcelonami ingerlanneqarmat peqataavoq. Septembarip 15-anit 18-at ilanngullugu ingerlanneqarpoq.
Ussatitsinermi Nunatsinnit Visit Greenland aaqqissuisuuvoq, ornigarneqarluartorlu oqaatigineqarpoq.
- Takornariartitsisarneq arlaqartunit apersuutigineqarpoq, takornariaassuarnilli Nunatsinnut angallasserusuttunik saaffiginnittoqanngilaq. Takornariaassuarnilli Nunatsinnukaassisartut amerlanerusunik umiarsuarnik Kalaallit Nunaannukaasserusuttut arlaqarput, Royal Arctic Logisticsimit Gorm Diernisse tusagassiutinut nalunaarummi oqarpoq.
Takornariaassuit Issittumukaasserusuttut amerliartortut Visit Greenlandimit oqaatigineqarpoq, ineriartortinneqarnissaami periarfissarpassuaqartoq oqaatigineqarluni.
- Kalaallit Nunaannukaassinissamut inatsisit amerliartorneri pissutaallutik tunuarsimaarfigineqalaarpoq. Inatsisit tamakkiisumik ilisimaneqanngillat. Inatsisit atuutilerpata suut malittarineqassanersut suli ilisimaneqarpiannginnera pissutaalluni tuniarsimaarnerupput, Gorm Diernisse oqarpoq.
Kalaallit Nunaannukaassissagaanni akileraarutit annikillineqarnissaat siunissamut soqutigineqarluarpoq. Inatsisit toqqammaviusut paasineqarluariarpata Nunatsinnukaassisarnissaq soqutigineqarlualissasoq Visit Greenlandimit qularineqanngilaq.