turisme
Takornariarpassuit takkuttussanngortut
Mittarfiit nutaat kingunerinik Kalaallit Nunaat takornarianit ornigarumaneqarnerulissasoq, Visit Greenlandip pisortaata Anders Stenbakkenip neriuutigaa
Takornariartitsinermut atatillugu ukiut tamaasa aaqqissuunneqartartoq Vestnorden Travel Mart, Islandimi ukioq manna ingerlanneqarpoq, tamannami ukioq allortarlugu pisarami.
Pisumi tamatumani Visit Greenlandip pisortaa Anders Stenbakken Kalaallit Nunaata takornariartitsinermut atatillugu qanoq inissisimanera pillugu oqalugiarpoq. Taassuma Kalaallit Nunaat nunarsuarmut angeqisumut naleqqiullugu orninneqartarnera killeqaqimmat isertuutinngilaa.
Ornigarumaneqarluartoq
- Pissutsilli allanngoriartorput aamma ukiuni qulikkaartuni tulliuttuni Kalaallit Nunaat takornarianit ornigarumaneqarluartoq takujumaarparsi, Visit Greenlandip pisortaa Anders Stenbakken katersuussimasunut annerusumik Islandimeersunut, Savalimmiuneersunut Kalaallit Nunaanneersunullu oqalugiaammini taama aallartippoq.
Oqalugiaammini erseqqissarpaa, tassunga killinnissaq ajornaatsuinnaanavianngimmat. Nunarsuup avannaani nunap qorsuuallaanngitsup avammut malugitinniarnissaa suliassaavoq ilungersunartoq.
- Takuneqarsinnaasutigut atuagassiissutigineqartutigullu erseqqissumik periaaseqarnissaq pisariaqarpoq, taanna oqarpoq, tamatumalu kingorna oqaluttuaralugu sooq Kalaallit Nunaat takornarianit ornikkumaneqartarnersoq.
Allaanerujusussuaq
Apequlli tamanna ataasiinnarmik akissutissaqartinneqanngilaq.
- Tamatumunnga pissutaasut assigiinngitsuupput, tamatumani angalasut qanoq ittuunersut inuttullu soqutigisaat suunersut apeqqutaasaramik. Inoqarpoq immaqa kulturimut tunngasut pissutigalugit tikittartunik, aammali assit iluliarpassuarnik takutitsisut, silaannaap minguitsup tikkanik, erngup ima minguitsigisup allaat kuummit imerneqarsinnaaneranik aamma sineriak illoqarfeeqqanik siaffigineqarsimasoq takorloorlugit tikittartunik. Kalaallimmi Nunaat inuup ulluinnarni inuuneranit allaannerujussuuvoq, taanna oqarpoq.
Allaaserisaq tamaat Sermitsiami saqqummertumi kingullermi atuaruk. Aviisi uani pisiariuk: