Takornariaqarneruneq piumasaqaatitaqarpoq
Kalaallit Nunaanni takornariat 2030-mi marloriaatinngorpata, nunatsinni unammilligassat akornuteqanngitsumik, takornarianut najugaqavissunullu pakatsinanngitsumik naammassisinnaanissaat pisariaqarpoq.
Visit Greenlandimi pisortap Julie Parsip nunat tamalaat akornanni ataatsimeersuarnermi Nuummi ingerlanneqartumi oqalugiarnermini paasititsissutigisaa takornariat timmisartorlutik tikittartut 2017-imi 57.000.iusut 2030-mi 110.000-iussasut naatsorsuutigineqartoq. Taakku saniatigut saqqummiunneqarpoq sinersorlutik takornariartut ukiuni kingullerni amerliartuinnartut.
Takornariat amerliartuinnarneri apeqqutinik arlalinnik pilersitsisoq, Julie Pars peqataasunut 135-usunut saqqummiinermini oqarpoq.
Kikkut aggersassavagut, aamma qassit tikisissinnaavagut, apeqqutit taakku marluk nunatsinni akornuteqanngitsumik, takornarianik misigisassarsiorluni angallassisinnaanermik periarfissaqartitsinermi, apeqqutigineqarput.
Aarleqqutissat
Julie Parsip aarleqqutigisami ilaat saqqummiuppaa. Tassa Barcelonami, Spaniami illoqarfiit ilaanni takornariat ima amerlatigilersimammata allaat illoqarfimmut akornutaalersimallutik, taamaatullu illoqarfimmi malittarisassaliortoqartariaqalersimasoq.
Sillimaniarneq pitsaassuserlu Julie Parsip saqqummiussaani aamma ilaapput.
- Pitsaanngitsumik eqqartorneqarneq ullumikkut akornutaangaatsiarsinnaavoq aqukkuminaattuullunilu, Julie Pars oqarpoq, tassani nittartakkakkut attaveqatigiittarfiit takornariartitsiviillu pitsaanerpaamik inissisimasariaqartut pineqarput.
Akuersissutitut allagartat ujartorai
Takornarianut nioqqutigineqartartut akuerisatut allagartaqalernissaat Julie Parsip aamma ujartorpaa, taamaaliornikkut takornariat pitsaanerpaanik nioqqutinik niuerfigineqarsinnaalerniassammata.
Ilanngullugu tikkuarpaa nunatsinni pingaarnerpaajunngitsoq neriniartarfiit pitsaanerpaaginnaat akunnittarfiillu pitsaanerpaaginnaat pigisariaqarigut, kisiannili tikerartut apeqqutaasa akisinnaanissaat pingaarnerpaajusoq.
- Misigisassarsiorlutik takornariartut immikkuullarissuupput, Julie Pars naqissusiivoq, ilanngullugulu tikkuarlugu taamatut takornariartut tassaasarmata Kalaallit Nunaanni najugaqavissut inooriaasiannik pinngortitaanillu takornariarumasartuusut.
- Aap, misigisassarsiorluni takornariartoq nerereernerup kingorna erruinissaminut akuersaarnerusinnaavoq. Piviusut ujartortarpaat, najugaqavissut nerisaat misilikkusuttarpaat oqaloqateqarusuttarlutillu, Julie Pars nassuiaavoq, taamaaliornerminilu takutillugu Kalaallit Nunaanni takornariartunut neqeroorutissatut piukkunnartorpassuit.
Immikkuullarissut eqqaamallugit
Kalaallit Nunaata immikkuullarissusaanik Maliina Abelsen, Air Greenlandimi niuernermi pisortaq, eqqaamaqqusivoq.
- Puigussanngilarput immikkuullarissunik peqaratta, soorlu piumallerutta saarullik imaaniit qaqissinnaavarput, salinnissaa eqqarsaatiginngikkaluarlugu, Maliina Abelsen oqarpoq.
Timmisartuutileqatigiiffiup ingerlatsinerit allanngorarsinnaaneri unammillernartuunerpaasut taassuma ilisimatitsissutigaa, taamatullu sila pissutigalugu timmisartut uniinnartariaqartarnerisa pitsaanerusumik paasissutissiissutigineqartarnissaat pisariaqartuusoralugu paasissutissiissutigalugu.