kusanartumik sanaartorneq
Takornariaqarnerulernerup kusanartumik illuliortaaseq periarfissaqalersippaa
Illuliornermik suliaqartoq kunngikkormiunut atasoq, Noah Boe-Whitehorn, Nunatsinni Orbiconimi ingeniørinik suleqateqarnermik aallartitsivoq, siunissami kusanarnerusunik sanaartortalernissaq neriuutigalugu
Qallunaat arkitektit suliffeqarfiutaat mikisoq, Noah Boe-Whitehorn Arkitekter, maanna Ilulissat eqqaani nunaqarfimmi Ilimanami illut oqaluttuarisaanermut attuumassuteqartunik iluarsartuussinermut aqutsisuupput.
Arkitektillu siunissami Kalaallit Nunaanni suliassaqaqqilerumaarlutik neriuutigaat, aasaanerani kingullermi takornariat amerlanerusut siornatigumut sanilliullugu tikittalernerat pissutigalugu, aammalu takornarissat sanaartukkat kusanartut nuannarimmatigit.
Qisuit najukkameersut aamma kulturi
Noah Boe-Whitehorn aamma Nunatsinni Orbiconimi pisortaq, Michael Mørch, suleqatigiinnissamut isumaqatigiissut 'issittumi illuliortaatsimut kusanarnerusumik aamma najukkamut tunnganerusumik' taasaminnik assammissuteqaqqammerput.
Najukkamullu tunngasumik oqaaseqarneq oqaasiinnaatinneqanngilaq.
Tassami arkitektit Qullissani qisuit nutaanngitsut aaneqarnissaat misissorsimavaat, taakku KGH-p Ilimanami illuinut kusanartunut sanaqqiinissamut atorneqassapput, aasaaneranilu 2017-imi paasissutissiisarfittut, neriniartarfittut pisiniarfittullu taanna ammaqqinneqassaaq.
Kunngissamut sullissisimasoq
- Illuliortaaseq uannut najukkamut tunngasorujussuuvoq. Nunat ilaajuppata, sumiiffimmut oqaluttuarisaanermut attuumassutilinnik avatangiiseqarpata, pitsaassutsit immikkuullarilluinnartut attatiinnarnissaannit aserortoornissaannut ajornannginnerusarpoq, Noah Boe-Whitehorn oqarpoq, taassuma nunaqarfinni illut nutaanngitsut suliarinerisa saniatigut mianerisassanik iluarsartuussinernik suliaqarnikuuvoq, ilaatigut Frederik arfineq-pingajuata Amalienborgimi illussaarsuaraa, maanna kunngissakkunnik najugarineqartoq suliarisimavaa.
Michael Mørhip Nunatsinni Orbiconimeersup arkitektit piginnaasaat upperai.
- Baumann Boe-Whitehorn Arkitekterip iluarsartuussinermik aallutaqarnera, nutaamik sanaartorsinnaanitsinnik aamma kulturimut ataqqinnilluta iluarsartuussisinnaanitsinnillu isumaqarpoq, tamannalu Nunatsinni amigaatigigunarparput. Naammaannartumik sanaartortoqakkajuttarpoq, tamannalu kusanaqutaaneq ajorpoq. Ataatsimoorluta suliniutinik kusanarnerusunik aammalu akigissumik atortunillu eqqortunik pilersitsisinnaavugut. pisortaq oqarpoq.
Sanaartussamaalertut
Taakku suliffeqarfiit marluk, takornariaqarnerulernerup saniatigut aamma Nuummi inuttussuseqarnerulerneranik, sanaartortoqarnissaanik pisariaqartitsisussamik aallussipput.
Taakkuli suliffeqarfiit suleqatigiinnerat arlarluinnarmi aallarteqqaassaaq, tassa Ilulissani aamma Aasianni paaqqinnittarfinnik sanaartussapput.
Atuaruk: Illussanik titartaasartut ukua isfjordscenter titartassavaat