Højsæson for turister

Takornariaqarnermut pisortaq: Bell ajorpallaaqaaq

Bell 212-ip atuleneratigut angallannermi pissutsit ajorseriarsimapput, takornariaqarnermut pisortaq oqarpoq, taannalu ikiortissarsiorluni suaartarpoq

Nanortalik ajorseriarfigineqartutut misigisimavoq Kujataani Naalakkersuisut Bell 212-imik atuilersitsinerisa kingorna. Helikopteri silamik sunnertiavallaaqaaq taamaattumillu aallarnissarpassuit taamaatiinnarneqartarput

Nanortalimmi takornariaqarnermut pisortaq Niels Tækker Jepsen oqarpoq ukiuni 14-ini takornariaqarnermut pisortaanermini Kujataani angallannermi pissutsit aasaq manna aatsaat taama paatsiveqanngitsigisut. Tamatumunngalu pissutavoq helikopterit Bell 212-it atulernerat, tamakkua mikivallaaqimmata silamillu sunnertiavallaarlutik.
– Helikopterit Bell 212-it mikivallaaqaat. Kujataatalu silaanik sunnertiavallaaqaat. Siullermik Bell 212-imi inunnut qulingiluaannarnut inissaqarpoq, helikopterini S-61-ini ilaasut 19-iusarsimasut, Niels Tækker Jepsen, Air Greenlandip Kujataani pujorneranik unammilligassaa pillugu allaaserisamut oqaaseqaatitut allappoq.
– Nalinginnaasumillu ajorseriarnerup saniatigut ullaakkut nalunaaqutaq arfinermut Narsarsuarmut timmisartuussinissamik pilersaarutit ingerlannissaat ajornakusoortorujussuusoq - pissusiviusullu imaallutik aallarnissat 71 procentii taamaatiinnavinneqartarlutik imaluunniit ullup taassuma aqaguaniluunniit angumeriniarneqartarlutik. Taava uanga oqassaanga taamatut atugassaqartitsisoqarsinnaanngilaq, Kalaallit Nunaanni maani atuisartutsinnut imaluunniit nunanit allanit takornariatsinnut, Niels Tækker Jepsen allappoq, oqaatigalugulu Nanortalik allanik periarfissaqanngitsoq helikopteri kisiat.
Maajimi Naalakkersuisut nalunaarput Kujataani angallannermi pissutsit allannguiffigineqassasut. Tamannali aatsaat pissaaq 2014-ip kingorna, sullissinissamik isumaqatigiissutit naareerpata.
Aamma atuaruk: Bell 212 ajornartorsiuteqartut Air Greenlandip nassuerutigaa
Aamma atuaruk: Kujataani Bell 212-it atuinnarneqassapput
Tamannali pissutigalugu takornariaqarnermut pisortaq isornartorsiuinissaminut tunuarsimaanngilaq:
– Taamaattumik innuttaasut tikeraartivullu tamaasa sinnerlugit nipituumik suaartassaanga: Ikiortigut!! Aasaq qilanaarisarparput takornariat tikerartarmata. Bell 212-illi atulerneratigut angallannermi pissutsit ajorseriarsimapput, Niels Tækker Jepsen allappoq.
Bell 212-it ukiut nikinneranni atorneqalerpoq, Naalakkersuisut aalajangermata S-61-it atorunnaarsikkiartuaarneqassasut.
Sermitsiaq.AG-p Air Greenland oqaaseqartinniarsaraa.

Powered by Labrador CMS