Takornariaqarnermik ingerlatsisut Nunarput Kinami nittarsaappaat

Kunngikkut Kinamut tikeraarnerannut atatillugu sapaatip akunnerani uani Visit Greenland Danmarkimi Savalimmiunilu takornariaqarnermik ingerlatsisut peqatigalugit Beijing-imiippoq, naalagaaffeqatigiinni nunat pingasut takornariarfissatut nittarsaanniarlugit. Visit Greenlandip, Inuussutissarsiornermut Naalakkersuisoqarfiup, Air Greenlandip aamma Arctic Wonderland Tours-ip, angalanermi aamma peqataasup, siuinertaraat Kalaallit Nunaannut takornarianik amerlanerusunik pilerisitsilernissaq.
– Kinamiut 1000- missaanniittut siorna tikeraartoraavut tamakkualu pingaartumik Tunumi Ilulissanilu unnuisarput, Visit Greenlandip pisortaa Anders Stenbakken oqaluttuarpoq nangillunilu:
– Dronningip prins Henriullu Kinamut tikeraarnerat tunngavissaalluarsimavoq Kinami ingerlatsivinnik, Kalaallit Nunaannut angalanernik tuniniaasareersunik tuniniaasalerniartunillu, naapitsinissatsinnut. Angalanermi pissarsiavut maanna nalilersussavagut, isumalluarnarpasippulli, taanna oqarpoq.

Ataatsimut nittarsaaneq aamma Kalaallit Nunaata ullua
Sisamanngornermi Beijing-imi Scandinavian Tourist Board-ip aaqqissugaanik nittarsaanermi kalaallit peqataapput, tassanilu sammineqarput nunani taakkunani pingasuni misigisassatigut angalanermilu periarfissat.
Pisoq tamanna aqaguani Kalaallit Nunaata imminut nittarsaanneranut tunuliaqutaallluarpoq, taannalu aaqqissuunneqarpoq Inuussutissarsiornermut Naalakkersuisoqarfimmit aamma Visit Greenlandimit, peqataappullu inuit 40-t angalatitseqatigiiffinnit 17-ineersut aammalu tusagassiorfiit, Beijing-imiinnaanngitsut, Kinamili illoqarfissuarnit allanit millionilinnik inulinneersut.
– Sumunngarfissatut Kinami nutaajupajaaraluarluta ingerlatsiviit taama amerlatigisut takkummata tamanna takussutissaavoq Kinami tuniniaavissatut ilimanaateqarluarpoq ukiuni aggersuni iluaqutigilersinnaasatsinnik, paasiartulerutsigu Kinamiut Kalaallit Nunaanni takornariatut suut apersuutigissaneraat, Anders Stenbakken oqarpoq.

Kinamiut takornariat issittumukaapput
Ukiuni kingullerni Sikuiuitsoq Kujalleq kinamiunit takornarianit nuannarineqarnerpaasimavoq, pingaartumik assiliiartorlutik tassungartartut, kinamiullu pisuut amerligaluttuinnartut Norgep avannaanukartalersimapput arsarnernik alutorsariartorlutik.
Kinamiut takornariat nunarsuaq tamakkerlugu angalasunit aningaasanik atuinerpaasarput, Kinallu tupinnaannartumik siuariartornera pissutigalugu middelklassit amerliartuinnartillugit kinamiut amerligaluttuinnartut siornatigornit ungasinnerusunut angalasalerput. Taamaasilluni naatsorsuutigineqarpoq 204-imi kinamiut 100 millionit nunanut allanut angalassasut.
Visit Greenlandip ukioq manna suliniummini Kina tuniniaavittut nutaatut sammivaa, sapaatillu akunnerani uani Ilulissani akunnittarfinni kinamiu suliniummik suliarinnittumik Li Wei Wang-imik Kinamut piareersimanissamik pikkorissartitsisimalluni.
Kina takornarianik pissarsiffiusinnaanera ukiuni kingullerni malunnarsiartorsimavoq Inuussutissarsiornermut Naalakkersuisoqarfiup nunani nunarsuarmi inuttunerpaami aatsitassanik suliniutaasa saniatigut sunniutaatut.