politi
Takornariaq qajariartoq tammaaneqartoq: Ujaasineq unitsinneqarpoq
Qajariarluni takornariaq 48-nik ukioqartoq kingullermik juulip 19-ani tusarfigineqarpoq. Politiit nalunaarutigaat ujaasineq unitsinneqartoq
Angut 48-nik ukioqartoq tyskeq tammaaneqartoq Qeqqani politiit juulip 29-ani nalunaarfigineqarput. Ilaatigut nalunaarfigineqarput angut kingullermik juulip 19-ani tusarfigineqarsimasoq, Qeqqani politikommisæri John Davidsen tusagassiutinut nalunaaruteqarpoq.
Takornariaq Kangerlussuarmit Sarfartuumukarpoq qajariarluni juulip 17-ani. Kangerlussuatsiamit Maniitsuliarniarluni pilersaarusiorsimalluni.
Tammaaneqartup qajariaa Packraft Alpakka Explore 42-voq, 2,5 meterisut takitigaluni. Satelittikkut oqarasuaateqarlunilu VHA-raatioqarluni angalavoq. Tupermik nassataqarpoq Big Agnes Seedhouse II-mik ilisimarnaateqarluni.
Tammaaneqartoq pillugu politiit ujaasipput. S-61-mik qulimiguulimmik ujaasisoqarpoq ulluni arlaqartuni. Sarfartuup Kangerlussuullu akornanni ujaasisoqarpoq.
Sarfartuumit aamma Maniitsup tungaanut aqqutissaa misissorneqarpoq, kiisalu aamma angut takuneqarsimanersoq kalerrisaarutigineqarluni.
Ujaasinermi kinguneqartoqanngilaq, aamma takunnissimasunik nalunaartoqanngilaq. Angut tammaaneqartoq sumiinnersoq ilisimaneqanngilaq, politiillu nalunaarutigaat ujaasineq unitsiinnarneqartoq.
Qaammammi ataatsimi ujaasisoqareersoq ujaasineq unitsiinnarneqarpoq, politikommisæri Johan Davisen allappoq.