nunatsinnit
Takornarianik pissarsiniarluni suliniut nutaaq
Air Greenlandip nittartagaq nutaaq Greenlandin3minuts.com saqqummiuppaa. Ilaatigut takornarianut tulunnut sammitinneqarpoq
Air Greenlandip nunanut tamalaanut nittarsaannerminut atatillugu timmisartortitseqatigiiffik nittartakkamik nutaamik takornarianut sammitinneqartumik saqqummiussivoq.
Greenlandineminutes.com, tassa Kalaallit Nunaata ussassaarutiginerpaasaasa tallimat ilaat, taakkualu aamma taaneqartarput ´The Big Arctic Five´: Qimusserneq, arsarnerit, arferit, sermeq apullu kiisalu innuttaasut maligassiuisut.
Oqaluttuat
Nittartagaq tassaavoq one-pager-imik taaneqartartoq. Qupperneq qimerluualaaerlugu oqaluttuarineqarpoq Kalaallit Nunaannut tikeraarluni suut misigineqarsinnaasut. Qupperneq Visit Greenlandip assilersorsimavaa torrallatarujussuarnik, aammalu takuniagassatut alutornartunik, unnuiffiusinnaasunik kalaallillu kulturiannik paasissutissartalerlugu.
Ukioq takornariaqarluarfik
– Ukioq manna takornariaqarluarsimaqaagut. Ussassaarinermillu suliniutitsigut matumuuna aamma ikorfartorneqassaaq, takornariat aamma 2016-imissaaq Kalaallit Nunaat angalaffissatut nuannersutut isigissagaat. Quppernikkut neriuutigaareput takornarianut isumassarsisitsisinnaalluta, taamaasilluni tullianik angalanissaminni manna toqqassallugu, Shiva Xenia Brunsvig, Air Greelandimi e-Business & Marketingschef, tusagassiorfinnut nalunaarutikkut erseqqissaavoq.
Tuluit Nunaat
Greenlandin3minutes.com novembarimi Tuluit Nunaanni saqqummiunneqassaaq, ´behaviorial targeting´-imik taaneqartartoq atorlugu. ´Behabiorial targeting´ atorlugu Air Greenlandip nettikkut ussassaarinermi anguniakkani eqqorluarnerusinnaavai.
Suliniut allakkianik nutaarsiassanik neqeroorutitalinnik malitseqartinneqassaaq.