Takornarianik angallassisartumut maanimiumut nersornaat kusanartoq

Arne Hardenbergip suliniutaa Greenland Extreme ingerlalluartorujussuuvoq.

Sullitaasa ilaata innersuussineratigut nersornaat kusanartoq nersornaatisissutisiareqqammerpaa. Atuagassiaq Luxury Travel Guide atuagassiaavoq angalanernik sammisaqartoq, atuartartunut pisuunut angalarusuttunut saa ginnittuusoq.

Taamaattumik taama angalarusuttut Arne Hardenbergip annerusumik aallutarai.

Misigisassat immikkut ittumik naleqqussakkat
Arne misigisassanik nalinginnaasunit annerusunik immikkut piukkunnarsarsimavoq.

Taamaattumik suliniutaata Greenland Extremep naleqqussakkatut ilaatigut neqeroorutigisarpai takornarianik nassuiaassineq, qulimiguulimmik qaqqamukaasseriarluni sisorartitsineq, tammajuitsussarsiorluni piniartitsineq, qissattariartitsinerit aamma soorlu nuannaariartaatinut Kalaallit Nunaanni angalaniartunut sullissineq.

Taama misigisassarsiortut immikkut ittumik akiliinissaminnut piareersimasarput, misigisassaallu Arnep isumagisarpai – taamatullu ingerlatsinini maanna nersornaatisissutigaa.

Misilittakkaminik tunuliaqutigissaartoq
Arne Hardenberg suliffeqarfiup ingerlataanut isumaginnittuummat nalaatsornerinnaanngilaq. Taannami nammineq sisorartartut pikkorinnerpaat ilaattut tunuliaquteqarpoq aamma kalaallit qallunaallu sangusaartartut nunanut allanut unammisartuini pikkorinnerni ilitsersuisuullunilu sungiusaasuusimalluni.

Piffissaq tamakkerlugu namminersortutut ingerlatsilinnginnermini ukiuni kingullerni Arne inuusuttunik inooqataanermikkut ajornartorsiuteqartunik, soorlu suliniummi Matumi aamma Timi Asimimi suleqataasimavoq, kingullertullu taaneqartoq suli attaveqarfigalugu.

Misigisassat immikkut ittut
Arne suliassaqaleraangami ilungersunartunik suliaqartarpoq, pilersaarusiorluni ilitsersuisoqassatillugulu peqataasarluni. Qujanartumilli ilaanneeriarluni unilaarluni Kalaallit Nunaanni pinngortitaq misigisassallu imaannaanngitsut aamma piffissaqarfigineqartarput.

Arnep ukiuni kingullerni arlalinni nuannaariartaassuit maanga tikittartut nassuiaassisuuffigisarpai piumasaqaatigineqartullu qaffasissorujussuusarlutik, sullitaasali akornanni naammagisimaarinnilluartoqartartoq oqaluttuaraa.

Sullittakkama amerlanersaasa toqqaannartumik saaffigisarpaannga, tassa siornatigut angallassisuuffigisimasannit innersuunneqartarsimagama, Arne Hardenberg oqaluttuarpoq.

Sulineq ukiup qanoq ilineranut tunngassutilik

Arne Hardenbergimut ulapaarfiunerpaasartoq tassaavoq upernaaq, piffissamimi tamatumani qulimiguulimmik sisorariartitsisarneq aallunneqarnerpaasarmat. Qulimiguulimmik sisorariartitsinerit sisoraatinik timersornerupput, tassa sisorartussat qulimiguulimmik qaqqap qaavanukaanneqartarlutik tassanngaanniillu naqqanut sisusoqartarluni.

Kalaallit Nunaanni qulimiguulimmik sisorariartitsisarnerup allanit allaanerussutigaa sisu usartuni amerlasuuni sissaq angullugu sisusoqarsinnaasarnera – tamannalu asseqanngilaq.

Aput nutaaq attorneqarsimanngitsoq sisorariartut naatsorsuutigisarpaat. Taamaattumik tamanna inuilaami ingerlanneqarajuttarpoq. Arnemut aasap qaammataani aamma saaffiginnittoqartarpoq aalisarsinnaanerminnik, tammajuitsussarsiorlutik piniarsinnaanerminnik, allaammi sisorarnissamut periarfissanik ujartuisunik.

Tamakku tamaasa Arnep aaqqissuunniartarpai, angalanernilu taamaattuni immikkuualuttut tamarmik isumagineqarnissaat isumagisarlugit.

Nuannaariartaataannaanngitsut
Arne Hardenbergip pinngortitamiinnissani nuannarisaqaa aamma naak inuulluataarluni angalanerit annermik isertitsi gisaraluarlugit maanimiut apersuisut suulluunniit ammaffigisarpai.

Taamaattumik Quassussuaq kaajallallugu pisunniartut ilitsersortissarsiortut itigartinneq ajorpai, tassa sullissassanik allanik ullorsiutimini allassimasoqanngikkaangat.

Tamanut Nuuk Ugeavis tamaat linki ataaniittoq toorlugu atuaruk