takornariaqarneq

Takornarialerisut kineserinut nittarsaasut

Kineserit, islandimiut qallunaat kalaallillu angalatitsitseqatigiivisa Ilulissat ulluni makkunani tikeraarpaat. Tikeraarneranni Kinamit Qeqertarsuup Tunuanut takornariartartut amerlisarniarneqarput

Ole Gamst-Pedersenip nuliatalu Trinep qimussertarneq qimmillu pillugit Chinese Arctic Travel Summit-imeqarnerani silatiminni paasisitsiniaanerat iluatsilluarpoq

Kineserit, islandimiut qallunaat kalaallillu angalatitsitseqatigiivinit aallartitat 18-it kiisalu kineserit tusagassiortut marluk lluni makkunani Ilulissani Hotel Arcticimiipput Ilulissat takornariarfittut paasisassarsiorfigalugu, minnerunngitsumillu takornariarnerit, hotellit, nerisassat aliikkusersuinerillu nammineq misiginiarlugit.

Pisoq taaguuserneqarsimavoq ’Chinese Arctic Travel Summit’, aaqqissuunneqarsimallunilu Qaasuitsup Kommuniata, Visit Greenlandip aamma kalaallit takornariaqarnermik suliaqartut, Air Greenland aamma unammillertaa Air Icenland, suleqatigiinnerisigut.

Kineserit amerliartuinnartut ukiuni kingullerni qaangiuttuni, Tunumuinnaanngitsoq, kisianni aamma nunatta kitaanut, ingammik Qeqertarsuup Tunuanut, tikittalerput. Tassa taanna ineriartorneq annertusarusullugu kalaallit takornariaqarnermik suliaqartut uuminnga aaqqissuipput.

- Hotelimi ullumikkut annikinnerusumik saqqummiisitsilluta aaqqissuussaqassaagut, illoqarfimmi takoriaqarnermik suliaqartut nioqqutissaatiminnik saqqummiussiffigisassaannik, ilaatigullu aamma Ilulissani mittarfiup tallineqarneqarnissanut pilersaarutit saqqummiunneqassapput, tamakkualu tamaasa qilanaarivagut, Malik Milfeldt Visit Greenlandimeersoq taama oqarpoq.

Unitsitsiinnartoqaraluartoq iluarisimaarinnipput
Kineserit Kangerlussuarmut marlunngormat tikipput, avannamullu ingerlaqqinnginnerminni sermersuaq alakkarpaat. Ullullu kingulliit illoqarfimmi takusassiornermut sermermiunilu apusiuserluni angalaarnermut atorneqarsimapput, qimussernissamut angallammillu angalaarutsinnissamut pilersaarutit unitsiinnartariaqaraluarsimasut iluatsilluartumik pilersaarusiortoqarsimasoq Malik Milfeldt oqaluttuarpoq.

- Takornarialerinermik suliaqartut tamarmik nalunngilaat pisussat pilersaarutaasut naapertorlugit tamarmik ingerlanneqarneq ajortut, kisianni tamakkuninnga tamaani suliaqartut allanik aamma puigunaatsorsiffiusinnaasunik neqerooruteqarnissaq pikkoriffigilluinnarpaat, taamaattumik Kangianit tikeraartutta tamaaniinnertik nuannaarutigalugulu iluaraat, Malik Milfeldt oqaluttuarpoq.

Nive Nielsen immikkut ittumik tusarnaartitsisoq
Malik Milfeldtip oqaluttuarnera naapertorlugu aamma kulturikkut misigisassaqartitsinermi immikkut nittarsaasoqarsimavoq, ingammillu nerisassaatigut kineserinit mamarineqarsimapput.

Aamma illoqarfimmi erinarsoqatigiit, nunani avannarlerni ministerit ataatsimiinneranni appisimaartut nuannarineqarsimapput, pingasunngormallu aamma Nive Nielsen kineserinut tikeraartunut immikkut ittumik appisimaarsimavoq, ullumikkullu aamma sisamanngornermi unnukkut atisanik Great Greenlandimit, Nuuk Couturemit aamma Isaksen Designimit atisaliarineqarsimasunik takutitsisoqassalluni.

Aamma ‘Chinese Arctic Travel Summit’-ip ingerlanneqarnera iluatsillugu Hotel Arcticip nittartakkami nutarternera saqqummiuppaa, maannami nittartagaq aamma kinerisit oqaasii atorlugit atuarneqarsinnaalermat.

Powered by Labrador CMS