Tunu
Takornarialerisoq: Billetsinik neqerooruteqarsinnaannginnerput ajorpallaaqaaq
Air Greenlandip kiffartuussinissamut isumaqatigiissutai maliinnarneqassasut Travellodge Greenland siunnersuuteqarpoq
- Kulusummukarnissassinnut aappaagu inniminniiniaritsi. Qulimiguulimmut inniminniissussinnaanngilassi, kisianni pissutsit iluarsiumaarput.
Travellodge Greenlandimi pisortaq Lars Anker-Møller takornariarusullutik saaffiginnittunut taamatut oqartarpoq. Takornarialeriffimmit qimussiussinerit ilaatigut soqutigineqarluartuusarput.
Isumaqatigiittoqanngilaq
Namminersorlutik Oqartussat kiffartuussinissamut isumaqateqarsimannginnera pissutaalluni qulimiguulimmik timmisartuussinissamut inniminniisinnaanngilaq.
Aamma isumaqatigiissutaasut ukiortaamit atuukkunnaarpata qanoq pisoqaqqissanersoq Air Greenlandimit ilisimaneqanngikkallarpoq.
- Takornariat 20-t tikikkusullutik nalunaarnikuupput. Qulimiguulissaannut inniminniisinnaannginnerput tupaallaatigisarpaat. Tassami Namminersorlutik Oqartussat Air Greenlandilu suli isumaqatigiissuteqanngillat, Lars Anker-Møller oqarpoq.
Takornarianut kiisalu Kalaallit Nunaannut angalanissanut pilersaarusiortartunut sullissinneq pitsaanngitsuusoq oqaatigaa.
- Takornariat ilaat ukiorpassuit aningaasanik katersereernermi kingorna Kalaallit Nunaannukartarput. Maanngarneq akisuvoq, taamaattumik aki kiisalu sullissineq imminnut naleqquttariaqarput. Imaassinnaasormi Kalaallit Nunaannukarnissamik suliaqartuusut aamma Kalaallit Nunaat sullikkusukkunnaaraat, oqarpoq.
Takornarialerinermummi sullissisut ukiumut 2017-mut pilersaarutit paaserusulereerpaat. Taamaattumik patajaatsumik sullissisoqarnissaa kissaatigineqarpoq.
Kaaviiaartitsinermut eqquisoq
Kalaallit Nunaata immikkoortortaqarfiani takornarialerinermut sullissisut kaaviiaartitsinerannut pisoq eqquisoq Lars Anker-Møller oqarpoq.
- Takornariat Tunu toqqarsinnaanngippassuk Kalaallit Nunaata kitaa toqqaannassavaat. Taamatut sullissiniartoqarnera naammaginanngilluinnarpoq, Lars Anker-Møller oqarpoq.
Utaqqiisaagallartumik Air Greenland isumaqatigineqartariaqartoq siunnersuutigaa.
- Kiffartuussinissamut isumaqatigiissutissaq 2016-moortoq kingusinnerusukkut isumaqatiginninniutigineqarsinnaavoq, utaqqiisaagallartumillu 2016-mut isumaqatigiittoqarluni. Tassami 2016-mut angalanissamut inniminniisoqarsinnaanngilaq. Akisussaaffimmik tigusisoqartariaqalerpoq, Lars Anker-Møller oqarpoq.