Takornarialerinermut pilersaarummi anguniagaq nutaaq anguneqartoq
Nuna tamakkerlugu ataqatigiissaarisussamik, nunatsinni takornariat tikitassaannik ingerlatsisussamik ullumi pilersitsisoqarpoq.
Suliffeqarfik namminersortoq Greenland Visitor Centerimik taaguuteqartoq Nuummi inissisimavoq.
Namminersorlutik Oqartussat nalunaarusiaanni atuarneqarsinnaavoq Inuussutissarsiornermut Nukissiuuteqarnermullu Naalakkersuisoqarfimmit siulersuisoqarneq ingerlanneqarallassasoq.
Utaqqiisaa siulersuisut
- Suliffeqarfiup siulersuisugigallagaasa Sermermiuni takornariarfissap suliarineqarnissaa Namminersorlutillu Oqartussat, aningaasaliisussarsiornermi suliassai tigummigallassavai. Suliassat tassaassapput takornarianut sullissivinnik pilersitsiortorneq, taakkulu sanaartornerani avataaniit aningaasaliisussarsiornerit, nalunaarusiami paragraffini atuarneqarsinnaavoq. Nalunaarusiaq naalakkersuisumit Aqqalu Jerimiassenimit naalakkersuisoqarfiullu pisortaanit Jørn Skov Nielsenimit ataasinngormat atsiorneqarpoq.
Pisortamik atorfinitsitsinissaq tallimanillu ilaasortalimmik siulersuisoqalernissaq pilersaarutaavoq.
Ilisimatusarnermi siunnersuisoqatigiit
Ilisimatusarnermi siunnersuisoqatigiit immikkut ittoq siulersuisunik siunnersuisussaq pilersinneqassaaq. Pinngortitaleriffimmit, GEUS-imit, Niels Bohr Institutimit, DMI-mit National Snow Ice Data Centerimiillu siunnersorteqartitsisoqassaaq. Siunnersuisoqatigiinni ilaasortaatinneqartoq ataaseq arlallilluunnit Naalakkersuisunit qaqugukkulluunniit taarserneqarsinnaassapput.
Suliffeqarfik namminersortoq aningaasanut inatsisitigut sanaartorneqarnerani ingerlanneqarneranilu taperneqarsinnaasassaaq. Sanaartornermi aningaasartuutigineqartut ingerlatsinermilu tapiissutit pillugit Naalakkersuisut kommunillu akornanni “kommunip tapiisinnaaneranik isumaqatigiissuteqartarsinnaassapput”.
Nuummi sullissivissaq
Takornarianut sullissivissamut pilersaarusiornerit Nuummi ingerlalluarput. Royal Arctic Linep allaffeqarfigisimasai takornarialerinermi allaffinngortinneqassapput – takornariat sinersorlutik tikittarfissaanut qanittuaniileriissalluni.