pilluarit!
Taekwondortartoq Narsami timersullammanngortoq
Sapaammi ualikkut timersortarfimmi aaqqissuussisoqarnerani, Narsami timersortartut nersornaaserneqarput
Taekwondortartoq Christian Isaksen, timersuummini angusani pillugit Narsami 2016-imi timersullammanngorpoq. Taanna siornatigut nunarsuarmi aamma europami taekwondomi pissartanngortarnikuuvoq, ukiormannalu 7. Dan pissarsiaraa, imminullu masteritut taasinnaalerpoq, taannalu Nunatsinni anguneqarsinnaasut qaffasinnersaraat.
Sulorartartut arlallit akissarsisut
Ukioq manna Cecilia Josenius Narsami sungiusaasutsialanngorpoq, taanna sulorartartut Arsarnerit sungiusaasuuffigai. Cecilia Josenius nammineq sulorartartuuvoq, GM-imi aamma AWG-mi arlalinnik ujaminnattarnikuuvoq.
Narsami ukiormanna U-15-ini sulorartartut Mika Motzfeldt aamma Karolina J. Josenius, kiisalu U-17-ini sulorartartut Tias Dorph aamma Willy P. Jensen piukkunaatilittut toqqarneqarput. Kingulliit marluk atuarnertik pissutigalugu peqataanngillat.
Ataqqinaammik tapersersuinermullu nersornaatit
Aammattaaq Bolethe Stenskovimut ataqqinaammik nersornaasiisoqarpoq, ingammik inuusuttut timersuutaannut siuttutut. Taanna GIF-ip siulersuisuini ilaasortaavoq, Nunatsinnilu taekwondortartut kattuffianni aamma Arctic Sportimi siulittaasuulluni.
Naja Nuka & Erni Mølgaardimut tapersersuisutut nersornaasiisoqarpoq.
Innuttaasut amerlasuut aaqqissuussamut aggerput, kaffisornerup kaagisornerullu saniatigut tassani Oleeraq Nielsenip nipilersornermut ilinniartitaanillu tusarnaartitsisoqarpoq, kiisalu timersorluni takutitsisoqarpoq.