takornarialerineq
Taasisoqareernerata kingorna Demokraatit IA-mut isornartorsiuipput
Umiarsuarni takornariartaatini ilaasunut akitsuutip appartinnissaa pillugu Inatsisartuni taasissutigineqareersoq Demokraatit Inuit Ataqatigiit qununerarlugit isornartorsiorpaat
Umiarsuit takornariartaatsinut akitsuusiisarnerup atorunnaartinneqarnissaannut Inatsisartuni taasissutigineqarmat aqqaneq marluk akuersipput qulingiluat itigartitsisut sisamanngormat. Politikkerit marluk taaseqataanngillat.
Inuit Ataqatigiit aamma Partii Naleraq siunnersuummut itigartitsisimasut pillugu nittartakkami allaaserineqareerpoq.
Inuit Ataqatigiit siunnersuummut itigartitsisimanerannut Demokraatit isornartorsiuipput.
- Inuiaqatigiit iluarsartuussisoqarnissaa amingaatigaat immikkoortunilu assigiinngitsuni nutaamik eqqarsartoqarnissaa - kinguneqartussanik piffissaq ungasinnerusoq isigalugu sapinngisamik amerlanerpaat isumaqatigiissuteqarnerinik kinguaariit tulliuttut iluaqutissaannik. Kisianni allaanngilaq nunami partiit annersaata tullia IA qunusoq aalajangeeqataanissaminut. Tamanna uggornaqaaq, Inatsisartuni ilaasortaq Tillie Martinussen aamma Demokraatit politikkikkut oqaaseqartartuat Randi Vestergaard Evaldsen tusagassiutinut nalunaarummi allapput.
IA peqatiginngikkaluarlugu aaqqissuusseqqinneq
Inuit Ataqatigiit siunnersuummut itigartitsinerat 'takornariartitsinermut ajoqusiinerusoq' Demokraatinit oqariartuutigineqarpoq. Aamma IA uranisiornissamut naaggarluinnarnini pissutigalugu Demokraatinit isornartosiorneqarpoq. Tamanna ima Demokraatinit oqaaseqarfigineqarpoq: 'Taamatut isummernerup siunissami aatsitassanut politikkissamut qulartitsilerpoq aamma imaassinnaavoq aningaasaliisartut nunarput qissimikkumajunnaaraat.'
- IA isumaqarpoq 2015-mut Aningaasanut Inatsisissamut sipaarutissatut siunnersuutigineqartut kukkunerusut kisianni sumi sipaartoqarnissaanut nammineq siunnersuuteqanngilaq, Demokraatit tunuliaqutaralugit Inatsisartuni ilaasortat oqarput.
- Demokraatini IA suleqatigerusukkaluaqaarput. IA assut isumaqatigiissuteqarfigerusukkaluarparput Aningaasanut Inatsisissaq pillugu aamma piffissaq ungasinnerusoq isigalugu iluarsartuussinissanut. Kisianni IA-p suna tamaat unitsissinnaanngilaa. IA unikaallatsitsisussanngorlugu akuerineqarnavianngilaq. IA-p paasisariaqalerpaa, iluarsartuussineq pissasoq peqataappata peqataanngikkaluarpataluunniit.