Taasisitsinissamut aningaasaliisoqassaaq

Qaasuitsup Kommuniani kommunalbestyrelsi aqagu ataasinngornermi immikkut ittumik ataatsimiikkuni ataasiinnarmik oqaluuserisassaqarpoq: Qaasuitsup Kommuniata avinneqarnissaa pillugu innuttaasunik isummiutaasumik taasisitsinissaq.
Ataatsimiinneq nalunaaqutaq qulingiluanut telefonikkut ingerlanneqassaaq.
Kommunalbestyrelsimut ilaasortat isummerfiusumik taasisitsinermi aningaasartuutissatut allattoqarfiup naatsorsorsimasai akuersissutigissavaat.
Qaasuitsup kommuniani allaffeqarfiup naliliinera naapertorlugu taasisitsineq 1.500.000 kr.-nit missaannik aningasartuuteqarfiusinnaasoq. Aningaasaqarnermut ataatsimiititaliap ataatsimeereernerata kingorna kisitseqqittoqarmat, 499.000 kr.-nit nuutassatut qinnutigineqarput.
1,5 millioner koruunit ilaatigut atorneqassapput paasisitsiniaanermut angalanernullu, tamatumani kommunalbestyrelsimut ilaasortat - kommunip avinneqarnissaanut isumaqataasut isumaqataanngitsullu, angalanerni peqataassapput, taamaasilluni taasisinnaasut piareersarlugit Qaasuitsup Kommuniata avinneqarnissaanut namminneq isummernissaannut.
Ataatsimiigiaqqusissummi allassimavoq Kikkut tamat Oqartussaaqataanerat, Kommune, Attaveqatigiinneq , Attaveqqaatinullu ataatsimiititaliap aamma Aningaasaqarnermut Ataatsimititaliap kommunalbestyrelsimut innersuussutigivaat:
Tikkuussisumik taasisitsinissamut oqaasertassat akuerineqarnissaat.
Taasisitsinissaq aningaasalersorniarlugu Aningaasaqarnermut ilassutissanut imaluunniit aningaasanik immikkut ittumik nuussinissamut sumiillu aallertoqarsinnaasoq.
Paasissutissiineq ingerlanneqassasoq kommunalbestyrelsimut ilaasortat avinnissamut isumaqataasut akerliusullu avillutik angalassasut.
Kommunalbestyrelsi aalajangersimavoq Qaasuitsup Kommuniata avinneqarnissaa pillugu innuttaasut isummersorfiusumik taasitinneqassasut 2014-imi marsip 25-anni.