Aleqap atornerluinera
Taasisitsineq: Qinersisitsisoqassava?
Inatsisartunut qinersisoqarnissaanik Sermitsiaq.AG-p taasisitsinerani peqataagit
Aleqa Hammond Siumumeersoq aatsaat taama tatineqartigaaq, Inatsisartut kukkunersiuinermut ataatsimiititaliaata tallimanngormat unnukkut nalunaarutigereeraa Naalakkersuisut siulittaasuat namminersorlutik oqartussat landskarsiannut 106.363,27 koruuninik akiligassaqalersimasoq.
Akiligassanut tunuliaqutaapput timmisartumut billetsit nammineq atukkat, tamatumani Naalakkersuisut siulittaasuata ilaqutaanut billetsinut aningaasartuutit kiisalu akunnittarfimmi aningaasartuutit namminersorlutik oqartussanit akilerneqarsimallutik, tamatumani ilanngullugit neriniartarfimmiinnerit minibarimillu atuinerit. Tamatuma saniatigut kukkunersiuisup, Inatsisartunit toqqarneqarsimasup, paasissutissiissutaani allassimavoq namminersorlutik oqartussat ilassinnittarfiini inuinnartut aaqqissuussineq akilerneqarsimasoq.
Aningaasat katillugit 106.363,27 koruunit arlaleriarluni akileqquneqareersut Aleqa Hammondip maanna akilereersimavai.
Inuit Ataqatigiit siulittaasuat Sara Olsvig Sermitsiaq.AG-mut oqarnikuuvoq Naalakkersuisut siulittaasuat tatiginninnginnermik taasisitsiffiginiarlugu, landskarsip aningaasaataanik atornerluisimanera pissutigalugu.
Arfininngormat unnukkut Nuummi tusagassiortunik katersortitsinermi Aleqa Hammondip ersarissumik attortissimasup qinersisoqarnissaa itigartippaa, Atassutillu siulittaasortaava Knud Kristiansen isumaqanngilaq Aleqa Hammondip landskarsip aningaasaataanik atuisimanera kukkunerusoq.