Skip to main content

Taasinernik kisitsineq: Unnuamut pissangasoqarsinnaavoq

Ittoqqortoormiini taasinerit siulliullutik saqqummiunneqassagunavipput marlunngornermi unnukkut inuppassuarnit pissanngatigineqartumik taasinerit kisinneqalerpata. Namminersorlutik oqartussat oqaatigisinnaanngilaat nuna tamakkerlugu angusat qassinut saqqummiunneqassanersut

Nuummi illorsuarmi timersortarfimmi inuppassuarnit najuuffigineqartumik qinersineq ammarneqarpoq. Partiit siuttui tapersersortaallu taasereerlutik utaqqiinnarsinnaanngorpaat unnugu unnuaruluunniit taasinerit kisinneqareersimalernissaat.

- Kommunemut qinersinermi taasinerit nalunaaqutaq 22-ip missaani kisinneqareerput. Oqaatigisinnaanngilarali unnugu qassinut piareerumaarnerluta. Unnugu piareerumaarpugut neriuppugut aatsaat unnuaruussanngitsoq, Nuummi qinersivimmi pisortaq Frederik Lundblad oqarpoq.

Taamatuttaaq nunamut namminermut namminersorlutik oqartussani allattoqarfik nalunaarpoq taakkuuppullu taasinerit kisinneqarnerannik ataqatigiissaarisut piareertullu nittartakkamut www. valg.gl-mut ikineqartarumaarput.

- Siumut eqqoriarneqarsinnaanngilaq inernerugallartut marlunngornermi unnuap qeqqannginnerani imaluunniit unnuap qeqqareernerani pingasunngorninngortoq pigineqalissanersut, namminersorlutik oqartussat nalunaarput.

Naalakkersuisunngortitsiniarneq

Taasinerit kisinneqareerlutik saqqummiunneqartut siulliit tassaasagunavipput Ittoqqortoormiuni taasinerit tassami tassani nalunaaquttap akunnerinik marlunnik siulliupput. Tamanna pereerpat taasinerit kisinneqareersut tulleriaarlutik saqqummeralerumaarput.

Kingullermik Inatsisartunut qinersinermi 72,9 procentit taasiartorput Siumup taasinernik 325-nik amerlanerussuteqalaarluni Naalakkersuisuni siulittaasunngortitsineranik inerneqarluni.

Siumup Naalakkersuisullu siulittaasuat Kim Kielsen qanittumi AG-mut oqarpoq ataqqiniarlugu qinersinerup kingorna partiini anginersanngortoq naalakkersuisunngortitsiniarluni isumaqatigiinniarnerik aqutsisuussasoq. Erseqqissumilli akinngilaa IA partiini anginersanngussagaluarpat naalakkersuisooqataarusunnerluni.

- Qinersinerup inernera takoqqaalaariartigu, Kim Kielsen akivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER