Taasineq: Kiffartuussinissamik isumaqatigiissut Naalagaaffeqatigiinnermut utertinneqassaaq

93-it akuersaarlutik taasipput, akerliusoqanngilaq 13-illu taaseqataanatik. Pituffimmi kiffartuussinissamut isumaqatigiissutip utertinneqarnissaanut Folketingimi taamatut sisamanngornermi taasineq inerneqarpoq.

Pituffimmi kiffartuussinissamik isumaqatigiissutip danskinut kalaallinullu uterteqqinneqarnissaa danskit naalakkersuisuisa uterteqqittariaqaleraat Folketingimi taasinerup takutippaa.

Inuit Ataqatigiit Folketingimi ilaasortaatitaanit Johan Lund Olsenimit Folketingimi partiinik assigiinngitsunik suleqateqarnermigut siunnersuut suleqataaffigineqarpoq.
Danskit illuatungiliuttuisa suliaq pitsaanerusariaqartutut isigaat.

Naammagisimaarneqarpoq
Danskit naalakkersuisuisa sulisimanerat sumulluunniit attuumassuteqanngitsunit misissorneqarnissaa Johan Lund Olsenimit ilaatigut siunnersuutigineqarpoq.

- Oqallinneq naammagisimaarpara. Danskit partiivisa Naalagaaffeqatigiinnermut pingaartitsisuunerat oqallinnermi erserpoq. Amerikarmiut Pituffimmiinnerat kalaallinut iluaqutaanerulernissaa anguniarneqarpoq, Danmarkip soqutigisai pillugit suleriuseqarsimaneq iluarineqanngilaq, tassani EU-p inatsisai malillugit ilaatigut suleriuseqartoqarsimammammi. Siumulli isigisariaqarpugut, siunissarlugu neriulluarfigaara, Johan Lund Olsen pingasunngornermi oqallisereernermi oqarpoq.

Nunanut allanut ministeri Martin Lidegaard, Radikale Venstre, suleriuserisimasaa isornartorsiorneqarpoq.

- Suliaq Naalagaaffeqatigiinnermut pingaaruteqartuuvoq, Per Stig Møller, De Konservative, oqarpoq.

Siunnersuut
Siunnersuut akuerineqartoq ima imaqarpoq:

'Folketingimi ilaasortaasut danskit naalakkersuisuinut piumasaqarput 1) Pituffimmi kiffartuussinissamik isumaqatigiissutip danskinut kalaallinullu uterteqqinneqarnissaa 2) Amerikarmiut Pituffimmiititaqarnerat kalaallinut annerpaamik iluanaaruteqarfigineqassaaq ilinniartoqarnikkut kiisalu akileraarutinik isertitaqarnikkut suliffeqarnikkullu 3) kiffartuussinissamik isumaqatigiissutip piumasaqaataat ersarinnerunissaat qulakkeerneqassaaq.'

Pituffik pillugu taamatut siunnersuuteqartuupput: Johan Lund Olsen (Inuit Ataqatigiit), Nick Nielsen (Siumut), Troels Lund Poulsen (Venstre), Flemming Møller Mortensen (Socialdemokraterne), Helle Løvgreen Mølvig (Radikale Venstre), Annette Vilhelmsen (Socialistisk Folkeparti), Finn Sørensen (Enhedslisten), Mette Bock (Liberal Alliance) aamma Per Stig Møller fra De Konservative.

Dansk Folkeparti partiini kisiartaalluni siunnersuuteqartuni ilaatitaqanngilaq.

Februaarip 20-ani suliarineqassaaq
Amerikarmiut suliffeqarfiat Exelis Services/Vectrus oktobarimit kiffartuussinissamut isumaqatigiissut tigussavaa. Greenland Contractors Pituffimmi kiffartuussinissamik isumaqatigiissummik oktobarip tungaanut ingerlatsissaaq.

Suliffeqarfiit Pituffimmi kiffartuussinissamik isumaqatigiissummut qinnuteqarsimasut maalaarutitik februaarip 20-aatinnagu nassiussinnaavaat, taannalu suliaq USA-mit suliarineqassaaq.