Taasiilami meeqqat affaat inuuniarnermikkut ajornartorsiorput

Naalakkersuisut siulittaasuat, Kim Kielsen (S), ukiortaami oqalugiarnermini oqaatigaa, 2016 tassaassasoq ‘meeqqat ukiuat’, tamatumalu malitsigisaanik kissaatigalugu Tasiilami sumiginnarneqarsimasunut immikkut iliuuseqartoqassasoq.

Namminersorlutik Oqartussani naalakkersuisoqarfiit pingasut aamma Kommuneqarfik Sermersooq maanna Tasiilami inuuniarnikkut ajornartorsiutit nutaamik aaqqiissutissarsiorfiginissaannut suleqatigiilerput.

Kisimiilluni aaqqinneqarsinnaanngitsut
Namminersorlutik Oqartussallu siunnerfilimmik suleqatigiissinnaanerput nuannaarutigaarput. Ajornartorsiutit ima annertutigipput kikkut tamarmik ikioqatigiikkunik aatsaat qaangerneqarsinnaallutik, Kommuneqarfik Sermersuumi Meeqqanut, Ilaqutariinnut Atuarfeqarnermullu Ingerlatsivimmi pisortaq, Søren Valbak oqarpoq.

Kommunip immikkoortoq ukiuni kingullerni misissuiffiginikuuaa, paasinarsisimallunilu ilaqutariinni meeqqat amerlasuut atugarliortuusut. Kommuneqarfik Sermersuup illoqarfimmi meeqqat najugaqartut affaat pillugit isumaginninnikkut suliassat annerusumik minnerusumilluunniit ilungersunaateqartut suliassaatigai.

Atuaruk: Tasiilami suliffissaaleqisut atuarnissamut allannissamullu ikiorneqartut

Ajornartorsiutip annertussusaa pissutigalugu suleqatigiissitami ilaasortat isumaqatigiissutigaat, nutaamik eqqarsartoqartariaqalersoq.

Tamarmik avataanut inissinneqarsinnaanngitsut
- Ajornartorsiummik aaqqiiniarluni nalinginnaasumik iliuuseqartarneq malissagaanni meeqqat atugarliuuteqartut angerlarsimaffiup avataanut inissinneqassapput. Manna tikillugu taamaaliortarpugut angusalli pitsaavallaarsimanngillat. Taamaammat meeqqap avatangiisaata tamakkiisup sulissutigineqarnissaa pisariaqartuusoraara, Søren Valbak oqarpoq.

Atuaruk: Tunumut atisanik atornikunik karsinik 35-nik katersisimasoq

Tarnip pissusaanik ilisimasalissarsiortut
Tasiilami inuuniarnikkut ajornartorsiutit ullumikkutut annertugilersimanerat isiginnaaginnarneqarsimavorlusooq, ilaatigut Ammassalik Kommuniusimasumi nukissaalatsineq pissutaalluni, ilaatigullu pisariaqartunik sulisussarsiniartarnerup Tunumi ajornakusoortuunera pissutaalluni.

Kommuneqarfik Sermersooq Tasiilami tarnip pissusaanik immikkut ilisimasalinnik marlunnik pissarsioqqammeraluarpoq, ataatsimilluunniilli qinnuteqartoqanngilaq.

Atuaruk: Tasiilami Ittoqqortoormiinilu pinnguartarfinnik nutaanik sanasut