Trafik
Taarluinnartumi timmisartuussinerit unitsinneqassapput
Seqernup qaammatillu tarreqqanerani qulimiguulinnik timmisartuussinerit inerteqqutaalerput. Tamannalu avannaani angallassinerit allanngortariaqalernerannik kinguneqassaaq
Angallannermi-, sanaartornermi-, ineqarnermilu aqutsisoqarfiup Danmarkimiittup nunatsinni qulimiguulinnik timmisartuussinermi isumannaallisaaneq annertusivaa.
Piumasaqaatit isumaqarput, taarluinnartumi timmisoqarsinnaajunnaassasoq. tassa seqineq qaammallu tarreqqanerini timmisartuussinerit pisinnaajunnaassapput.
Taamaattumik Air Greenlandip Avannaani angallannermut isumaqatigiissutaa allanngortittariaqalerpoq.
- Allannguutit nutaat tamaasa tikilluaqquasarpagut, timmisartuussinermi isumannaallisaanermi nutartereqataasut.Maannakkullu suliassarput pingaarnerpaaq tassaalerpoq sullitagut minnerpaamik allannguineq misigissagaat. Maliina Abelsen niuernermi pisortaasoq tusagassiutinut nalunaarummini allappoq.
Air Greenlandip nalunaarutigaa ilaasut allannguummik eqqorneqartut angalanissamut pilersaarumik nutaamik tunineqassasut. Allannguutit pillugit apeqqutissaqarunik Air Greenlandip Call Centerianut 70 12 12-mut sianerlutik saaffiginnissinnaapput.